Azərbaycan müxalifəti toplantı keçirir

Bu gün müxalifət partiyalarının iştirakı ilə “Dəyişən dünya: Azərbaycanda mövcud durum və perspektivlər” mövzusunda dəyirmi masa keçirilir.

Tədbirdə çıxış edən AZDP sədri Sülhəddin Əkbər qeyd edib ki, Azərbaycanda siyasi azadlıqlar pozulur: “Seçkilər ədalətli keçirilmir. KİV-ə müxalifət partiyalarının çıxışı məhdudlaşdırılır. Demokratiyaya inkişaf yolu qapadılır. Mərkəzi Bankın manatla bağlı qərarından sonra ölkədə sosial vəziyyət gərginləşəcək, inflyasiya artacaq, maaşlarda kəsinti müşahidə ediləcək”.

Tədbirdə çıxış edən VHP sədri Sabir Rüstəmxanlı bildirib ki, əslində dünyada qloballaşma və kürəsəlləşmə adı altında dünyanı bir dilli dünyaya çevirmək istəyirlər: “Bu gün ziddiyyətlər dünyanı bürüyür. Üçüncü dünya müharibəsi bu gün Şərqdə baş verir. Dünyada əslində dövlət başçılarının böhranı prosesi gedir. Kimin pulu varsa, hakimiyyətə o gəlir. Siyasi liderlər kənarda qalıb. Azərbaycan milləti bu gün müqavimət göstərmək gücünü itirib. Meydanda mübarizə aparan adamlar 20 ildir ki, bir birini ittiham etməkdən yorulmayıb. Hakimiyyətin ən böyük səhvi millətdən ayrı düşməsidir. Belə hakimiyyət uzun müddət qala bilməz”.

AXP sədri Pənah Hüseyn isə müxalifət və iqtidarın siyasi iradəyə ehtiyacı olduğunu vurğulayıb: “Bizim seçkilər dönəmində koalasiya qurmağa ehtiyac var. Açıq şəffaf şəkildə razılaşdırmalar aparılmalıdır. Hamı gözünü yumub gözləyir. Bu belə olmamalıdır”./Qafqazinfo/

Ölkə.Az