Deputat: “Ordumuz tezliklə işğal altında olan torpaqlarda Azərbaycan bayrağını dalğalandıracaq”

 Bunu “Ölkə.Az” a açıqlamasında millət vəkili Sabir Hacıyev deyib.

 Onun sözlərinə görə, Prezident  İlham Əliyev Ermənistanın müharibəyə başlaması və   təxribatla törədəcəyi barədə hələ bir neçə gün öncə BMT tribunasından səsləndirərək dünya ictimaiyyətini məlumatlandırıb. “Azərbaycan Prezidenti BMT tribunasından bir daha beynəlxalq aləmi və təşkilatları işğalçı Ermənistanın təcavüzkar siyasətinə son verməsi üçün  təxirəsalınmaz tədbirlər görməyə çağırıb. Çox təəssüflər olsun ki, nə beynəlxalq aləm Ermənistanın bu təxribatçı hərəkətlərinə lazımi reaksiyanı vermədi. Nəticədə Ermənistan sentyabrın 27-də  növbəti dəfə  BMT-nin Nizamnaməsini və beynəlxalq hüququ kobud şəkildə pozaraq Azərbaycana qarşı növbəti təxirbatı reallaşdırdı. Erməni ordusu  hər zaman olduğu kimi bu dəfə də beynəlxalq hüquq və konvensiyaları pozaraq  sivil insanları hədəf seçdi. Məqsəd də əhali arasında təşviş yaradıb, onları öz ata yurdlarından didərgin salmaq,  cəmiyyətdə panika yaratmaqdan ibarət idi. Ancaq erməni ordusunun bu təxribatının qarşısı  Azərbaycan ordusu  tərəfindən layiqincə  alınmaqdadır.  Azərbaycan ordusu düşmənin mövqelərinə sarsıdıcı zərbələr endirməklə ölən sivil insanların və şəhid olan hərbçilərimizin qısasını alır və almaqda davam edir”- deputat qeyd edib.

Millət vəkili əlavə edib ki,   Azərbaycan ordusu beynəlxalq hüquqa əsaslanaraq müdafiə olunmaq və təxribatların qarşısını almaq məqsədi ilə əks-hücum əməliyyatlarına başladı. “Azərbaycan ordusunun əks-hüçum əməliyyatları uğrula davam etməkdədir. Bu əks-hücumlar hər hansı ölkənin ərazisini işğal etməyə yox, işğal altında olan torpaqların işğaldan azad edilməsinə xidmət edir.  Ordumuzun  həyata keçirdiyi əməliyyatlar xalq tərəfindən sevinclə  və rəğbətlə qarşılanır.  Bu gün ölkədə  güclü xalq-hakimiyyət-ordu birliyi və həmrəyliyi mövcuddur. Xalq Ali Baş Komandanın ətrafında sız biləşərək orduya hər cür dəstək verməyə hazırdır. Yüzlərlə insan könüllü olaraq döyüşlərdə iştirak etmək üçün  Hərbi Səfərbərlik Xidmətinin yerli bölmələrinə müraciət edirlər. Cəmiyyətdə hğkm sürən ruh yüksəkliyi orduya da sirayət edib. Odur ki, ordumuz torpaqları işğaldan azad etmək istiqamətində daha əzmlə vuruşur. İnanırıq ki,  Azərbaycan ordusu qələbə  sevincini bizlərə yaşadacaq və Qarabağ işğaldan azad olunacaq.  Azərbaycan bayrağı işğal olunmuş ərazilərimizdə dalğalanacaq”.

Mürtəza

Ölkə.Az