“Qəsbkar Ermənistan bütün cəbhələrdə fiaskoya uğrayır” – Sabir Rüstəmxanlı
Bunu “Ölkə.Az”a açıqlamasında millət vəkili, Xalq yazıçısı Sabir Rüstəmxanlı deyib.
Deputat bildirib ki, erməni daşnaqları tarix boyu Qafqaz millətlərinə qarşı dəfələrlə terror aktları, qətliamlar törədiblər.
“Ermənilərin 1905-1906-ci illərdə bütün Qafqazda -İrəvan, Naxçıvan, Zəngəzur, Gəncə, Qarabağ, Bakı, Tiflis, Batumidə törətdikləri hadisələr qanlı terror aktlarıdır. Bunun davamı 1918-ci ildə Azərbaycanda yenidən yaşandı. Eyni vəhşiliklərlə uşaq, qadın, yaşlı bilmədən, insanlığa yaraşmayan tərzdə, onlara rəhm etmədən qətllər törətmək ermənilərin hər zaman xislətini ortaya qoyub. Daha sonra isə biz bu qətliamların davamına Xocalıda bir daha şahid olduq. Gəncə soyqırımı da ermənilərin törətdikləri növbəti qanlı terror aktlarının ardıdır. Gecə yarısı dinc, sivil insanlara belə alçaqcasına hücum etmək insanlığa sığan hərəkət deyil! Ballistik raketlə atəş açaraq, evləri dağıdıb, dinc əhalini, ən dəhşətlisi isə körpələri qətlə yetiriblər. Bu da ermənilərin vəhşiliklərinin əyani sübutudur”.
Millət vəkili Azərbaycanın döyüş meydanında olduğu kimi, informasiya müharibəsində də ermənilərin layiqli cavablarını verdiyini bildirib.
“Ermənilər uzun illər bizə qarşı informasiya müharibəsi, təbliğat aparıblar. Buna böyük vəsait xərcləyən ermənilərin bu gün dünya mətbuatında çoxsaylı tərəfdarları var. Əsasən, Rusiya televiziyaları, qəzetləri onların tərəfini tutur, etdikləri bütün əməllərinə don geyindirməyə çalışırlar. Ancaq biz də informasiya müharibəsində onlara layiqli cavablarını veririk. Hazırda qəsbkar Ermənistan bütün cəbhələrdə fiaskoya uğrayır”.
Vüsalə Balayeva
Ölkə.Az
