Əslən Zəngilandan olan musiqiçi Prezidentin qələbə müjdəsini BELƏ QARŞILADI - FOTO
Azərbaycanın tanınmış sənətçiləri öz sevinclərini “Ölkə.Az”la bölüşərək, Azərbaycan Ordusuna, Ali Baş Komandana öz təşəkkürlərini bildiriblər.
Əməkdar artist, kamança ifaçısı Elnur Əhmədov uzun illərdən sonra doğma torpağına qovuşmaq hissinin sözlə ifadə oluna bilməyəcəyini deyib:
“27 illik həsrətdən sonra o torpağa qovuşmaq ali bir hissdir. Bunu sözlə ifadə edə bilmirəm, mənə çox çətindir. Ali Baş Komandanın dilindən Zəngilanın azad olunması xəbərini eşitdikdə, çox kövrəldim. Təbii ki, bütün Qarabağ torpağı bizimdir və inanıram ki, tezliklə qələbə xəbərinə sevinəcəyik. Mən bu hissləri tezliklə hər bir qarabağlıya arzulayıram”.
Əməkdar artist Qarabağın musiqi beşiyi olduğunu, erməni terrorçularının bu ənənəni o torpaqdan silib, məhv edə bilməyəcəyini də dilə gətirib:
“Mən o torpaqda göz açmışam, sənətimə orada yiyələnmişəm. Hətta belə bir misal da var “Qarabağın iki evdən birində xanəndə var”. Qarabağ bizim musiqi beşiyimizdir. Babamın təbliğatı ilə musiqi sənətinə yiyələnmişəm. Yadımdadır, babamın iri bir qramafonu var idi, orada sənətkarlarımızın ifalarını dinləyərək, kamançanı sevmişəm. Bu illər ərzində Erməni terrorçuları çox çalışsa da bu ənənəni o torpaqdan silib, məhv edə bilmədilər. Çox şükürlər olsun ki, bu gün biz Cənab Prezidentimizin və rəşadətli ordumuzun sayəsində o torpaqlara yenidən qayıda bildik. Allahdan şəhidlərimizə rəhmət diləyirik, onların əzmi bizə qələbə sevincini yaşatdı”.
Sənətçi Xalq artisti Mənsum İbrahimovun başçılığı ilə “Qarabağ”muğam qrupu olaraq iyirmi beş il Qarabağı ölkəmizdən kənarda təbliğ etdiklərindən də söz açıb.
“Xalq artisti, görkəmli sənətkarımız Mənsum İbrahimovun başçılığı ilə əməkdar artist, tarzən Elçin Həşimovla birgə “Qarabağ” muğam qrupu olaraq, iyirmi beş ildir Qarabağı ölkəmizdən kənarda təbliğ etmişik. Hər zaman konsertlərimizin sonunda "Qarabağ şikəstəsi” muğamını ifa edərək, Qarabağın əzəli Azərbaycan torpağı olduğunu göstərmişik. Bizim Avropada keçirilən konsertlərimizin bukletlərində Mənsum İbrahimovun Ağdamdan, Elçin Həşimovun Füzulidən, mənim isə Zəngilandan olduğum qeyd olunurdu. Orada hər bölgənin adının qarşısında erməni terrorçuları tərəfindən işğal olunması da yazılırdı. Çox şükürlər olsun ki, bundan sonra o bukletlərdə Ağdam, Füzuli və Zəngilan işğal olunmuş torpaqlar kimi göstərilməyəcək. Bundan sevincli bir hiss yoxdur”.
Qələbə xəbərindən danışan əməkdar artist ən böyük arzusunun Şuşada “Qarabağ şikəstəsi” ifa etmək olduğunu da bildirib:
Mənim ən böyük arzum Cənab Ali Baş Komandanın Şuşada dalğalandırdığı Azərbaycan bayrağının altında “Qarabağ Şikəstəsi”ni ifa etməkdir. Allah tezliklə, bizi bu arzumuza çatdırsın”.
Vüsalə Balayeva
Ölkə.Az
