Gəncədə QANLI CİNAYƏT-17 yaşlı oğlanı ürəyindən bıçaqladılar

Gəncə şəhərində bir nəfəri öldürüb, bir nəfərə isə xəsarət yetirməkdə təqsirli bilinən Elgün Məmmədovun cinayət işi üzrə ibtidai istintaq başa çatıb.

"Ölkə.Az" xəbər verir ki, cinayət işinin materialları baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Nural Əliyevin icraatına verilib.

İş üzrə məhkəmə hazırlıq iclası dekabrın 3-nə təyin olunub.

Qeyd edək ki, hadisə ötən il Gəncə şəhəri, Təbriz küçəsi, "Xan Çinar" restoranının qarşısında baş verib.

Gəncə şəhər sakini, 2004-cü il təvəllüdlü Məmmədov Elgün Rövşən oğlu 2002-ci il təvəllüdlü Verdiyev Əzim Elşad oğlu ilə şəxsi münasibətlər zəminində mübahisə edib.

Mübahisə zamanı E.Məmmədov bıçaqla Ə.Verdiyevi ürəyindən bıçaqlayıb.

Bundan başqa, E.Məmmədov hadisə yerində mübahisəni sakitləşdirmək istəyən Gəncə şəhər sakini, 2003-cü il təvəllüdlü Həsənov Əlmuraz Fuad oğlunu da bıçaqlayıb.

Hər iki yaralı xəstəxanaya çatdırılsa da, Ə.Verdiyev orada ölüb.

Hadisə yerindən qaçan E.Məmmədov tutularaq istintaqa təhvil verilib.

Ölkə.Az