Qarabağda ədalətli həll olmasa, Rusiyanın planları həyata keçməyəcək (ŞƏRH)
Qaynarinfo xəbər verir ki, bu fikirləri Qafqaz Strateji Araşdırmalar Mərkəzinin sədr müavini Nazim Cəfərsoy bildirib. Onun sözlərinə görə, regionda yaranan reallıqlar isə Rusiyanın fərqli davranacağını göstərir:
"Ancaq günümüzdə qlobal, regional və ikitərəfli münasibətlər sistemi baxımından gətirdiyi reallıqlar və çağırışlar bizdə Rusiyanın bu dəfə regionda problemin deyil, ədalətli həllin parçası olacağına dair qənaəti gücləndirir. 44 günlük müharibədəki ümumi mövqeyi və 3 rayonda işğalın bitməsindəki rolu Rusiyanın bizim üçün tarixi təcrübəni dəyişdirmə niyyətinin konkret nümunələridir.
Bu proses başda Rusiyanın öz daxili güc tarazlığı və xarici siyasət praktikası baxımından çox mürəkkəb, çətin və müxtəlif müqavimətlərlə qarşılaşan bir prosesdir. Ancaq Rusiyanın içində olduğu geosiyasi, geoiqtisadi, geomədəni və hərbi reallıqlar Rusiya dövlət ağlını Avrasiyada türklərlə birlikdə əsas prinsipləri həqiqi sülh, təhlükəsizlik və rifah olan bir "Pax Avrasiya" qurmaq səylərinə məcbur edir. Putinin Türkiyə ilə Qafqazda bir sülh yaratmaq cəhdi və Qara dənizdə bir əməkdaşlıq modeli yaratmaq çağırışı "Pax Avrasiya"nın ən önəmli iki lahiyəsidir. Qarabagda ədalətli həll olmasa, Qafqazda sülh və əməkdaşlıq olmayacaq. Qafqazda sülh və əməkdaşlıq olmazsa, geniş mənada Qara dənizdə və Avrasiyada sülh və əməkdaşlıq olmayacaq! Bunu hamıdan yaxşı Rusiya strateji ağlı bilir!
Azərbaycanda yayğın olan qənaətin əksinə biz Rusiyanın Qarabağda problemi böyütmək və ya özünün birbaşa tərəf olacağını daha böyük məsələyə çevirəcəyini düşünmürük. Azərbaycanda Cənubi Osetiyanı Qarabağ üçün nümunə kimi verənlər çoxluqdadır, biz isə Qarabağın Cənubi Osetiya üçün həll modeli olacağını düşünürük. Vaxtı gələndə Rusiya Cənubi Osetiya məsələsini rəsmi Tiflislə Gürcüstanın ərazi bütövlüyü çərçivəsində həll etməyi təklif etsə, bizə sürpriz olmayacaq".
Başa çatan 2020-ci ildə baş verən önəmli olayları dəyərləndirən analitik gələn illə bağlı da gözləntilərini yayıb:
"2020-ci ildə Qarabağ məsələsi xırda bir təbəqə istisna olmaqla, demək olar ki, real baxımdan bütün Azərbaycan xalqı üçün müsbət mənada sürprizlə bitdi. Azərbaycan strateji ağlı dövlətin və xalqın potensialını səfərbər edərək Azərbaycan əsgərinin qanı və canı hesabına Qarabağda savaşı qazandı... 2021-ci il Azərbaycanın Qarabağda sülhü qazanacağı il olacaqdır!!! Bizim 2021-də Xankəndi, Xocalı, Xocavənd və Ağdərə başda olmaqla Azərbaycan dövlət suverenliyinin təmin olunacağından şübhəmiz yoxdur. Hamısında bayrağımız dalğalanacaq və məcburi köçkünlər bir dövlət planı çərçivəsində mərhələli olaraq öz evlərinə qayıdacaqlar.
Ancaq sülhü qazanmaq ən az müharibəni qazanmaq qədər çətin və mürəkkəb prosesdir.
Bu prosesdə bir yandan ermeni terrörizmi ilə, bir yandan da müxtəlif daxili və xarici provakasiyalarla mübarizə edəsi olacaq və ciddi bir psixoloji müharibə dövrü yaşanılacaqdır!
Bu ağır və məsuliyyətli dövrdə başda dövlət orqanları olmaq üzrə bütün Azərbaycan cəmiyyətinin öz üzərinə düşəni ağıl, təmkin, milii şüur və qərarlılıqla həyata keçirməlidir və bunu arzu edirik.
2020-də Azad, Bütöv, Adil və Demokratik (ABAD) Azərbaycana doğru bir böyük addım atıldı!
2021 ilinin Demokratik Azərbaycan üçün böyük bir addım atılacağı bir il olmasını həm təxmin, həm də arzu edirik!
Bu yol uzun bir yoldur və son 250 ildir ABAD Azərbaycan yolundan xeyli uzaq düşülmüşdü, artıq Azərbaycan o yola geri dönür..."
