“Vaksinasiya prosesində aktiv iştirak etsək, daha çox yumşalmalara gedəcəyik” - Baş infeksionist
“Əhalinin pandemiya ilə əlaqədar qaydalar ciddi əməl etməsi bu gün infeksiyanın səngiməsinə müəyyən töhfəsini verib”.
“Ölkə.az” xəbər verir ki, bunu Səhiyyə Nazirliyinin baş infeksionisti Təyyar Eyvazov deyib. O bildirib ki, bu gün əhalinin əhəmiyyətli hissəsində koronavirusa qarşı həssaslıq itib:
“Yəni ötən ilin martında bu həssaslıq 100 faiz idisə bu gün bu həssaslıq azalıb. Bu, təbii ki, yoluxmuş və immunitet qazanmış şəxslərin hesabına olub. Ölkəmizdəki vaksinasiya prosesinə nəzər salsaq görərik ki, infeksiyaya qarşı həssas insanların sayı günü-gündən azalmaqdadır.
Bütün bunlar ona gətirib çıxarır ki, biz yumşalmalara gedirik.
Hesab edirəm ki, vaxt keçdikcə qaydalara əməl etməklə, vaksinasiya prosesində könüllü və aktiv şəkildə kütləvi iştirak etməklə bundan da çox yumşalmalara gedəcəyik və əvvəlki həyatımıza qayıda biləcəyik”.
Billurə Yunus
