Deputat: “Bu, erməni cəmiyyətinin 10 noyabr bəyanatını qəbul etməsi deməkdir”

Ermənistanda növbədənkənar parlament seçkiləri erməni cəmiyyətinin az pislə çox pis arasında seçim etdiyini göstərdi.

Bunu “Ölkə.Az”a açıqlamasında millət vəkili Musa Qasımlı deyib.

Onun sözlərinə görə, Robert Köçəryan revanşist, qisasçı olduğundan, Ermənistanı yeni müharibəyə sürükləməyə cəhd etdiyindən erməni cəmiyyəti ona səs vermədi.

“Erməni cəmiyyəti 44 günlük müharibənin nəticələrini görmüşdü. İkinci, bu seçkini həm də 10 noyabr 2020-ci ilə bəyanatının referendumu kimi dəyərləndirmək olar. Yəni erməni cəmiyyəti 10 noyabr 2020-ci il bəyanatının nəticələrini qəbul edir”, - deputat qeyd edib.

Millət vəkilinin fikrincə, ermənilər zəhərlənmiş beyindən qurtulsalar, regionda normal münasibətlər qurmaq olar: “Paşinyanın və onun tərəfdarlarının qələbəsi, bir daha onu  göstərdi ki, erməni cəmiyyəti 44 günlük  müharibənin nəticələrini qəbul edir.  Tarixdə nardir  hallarda müharibədə məğlub olanı yenidən seçirlər.  Paşinyan da seçildi, deməli, xalq üçün bu nəticə məqbuldur. Burada həm də xarici faktorlar təsirsiz ötüşməyib. Əgər Köçəryan hakimiyyətə gəlsəydi, o zaman 10 noyabr  2020-ci ildə qəbul edilən Bəyanatın tələblərinin  həyata keçirilməsində problem yarana bilərdi ki, bu da bölgədə əlavə gərginliyə gətirib çıxarardı. Bu isə regionda marağı olan heç bir ölkənin, o cümlədən Rusiya və İranın marağına uyğun deyildi”.

Mürtəza
Ölkə.Az