Sahibə Qafarova Ərdoğanın parlamentdəki çıxışından danışdı
Türkiyə bu gün də, sabah da Azərbaycanın yanındadır.
"Ölkə.Az" xəbər verir ki, bunu Milli Məclisin Sədri Sahibə Qafarova növbədənkənar sessiyanın iclasında Türkiyə Prezidenti Ərdoğanın parıamentdə çıxışı haqqında mövqeyini açıqlayarkən deyib.
Milli Məclis Sədrinin sözlərinə görə, Ərdoğanın Şuşaya səfəri və parlamentdəki çıxışının beynəlxalq aləmə ünvanladığı mesaj bundan ibarət idi: "Azərbaycan-Türkiyə arasındakı qardaşlıq münasibəti əsrlərin sınağından çıxıb və dünyada analoqu olmayan münasibətlərdir. Bu qardaşlıq münasibətləri bundan sonra bu formada davam edəcək".
Spiker əlavə edib ki, Ərdoğanın rəhbərliyi ilə Türkiyə çox möhtəşəm inkişaf yolu keçib: “Bu gün siyasi, iqtisadi, hərbi gücünə görə Türkiyə dünyanın ən güclü ölkələrindən biridir. Qardaş ölkənin bu uğurları bizi sevindirir. Çünki Türkiyənin gücü Azərbaycanın gücü, Azərbaycanın gücü isə Türkiyənin gücüdür. Xalqlarımız arasında olan dostluq və qardaşlıq bizim ən böyük sərvətimizdir. Prezident İlham Əliyein də dediyi kimi Türkiyə-Azərbaycan dostluğu, qardaşlığı bu gün ən yüksək zirvədədir.
“Ermənistanın 30 ildən bəri işğal altında saxladığı torpaqları əsarətdən qurtarmaq üçün Ali Baş Komandan İlham Əliyevin rəhbərliyi ilə aparılan əməliyyatlar zamanı dünya Türkiyə- Azərbaycan qardaşlığına bir daha şahid oldu".
O bildirib ki, Türkiyə hər kəsə göstərdi ki, Azərbaycan haqq savaşında tək deyil: “İkinci Qarabağ müharibəsindən sonra bölgədə yeni reallıq yaranıb. Türkiyə Prezidenti Rəcəb Tayyib Ərdoğanın işğaldan azad edilmiş Şuşanı ziyarət etməsi, orada Azərbaycan və Türkiyə bayraqlarının yanaşı dalğalanması xalqlarımızın qardaşlığının növbəti nümayişi olub. Şuşada imzalanan bəyannamə bu münasibətləri daha da yüksəldib. Türkiyə Prezidentinin verdiyi ən önəmli mesajlardan biri də bu idi ki, Türkiyə Azətbaycanın yanındadır və bütün dünya bilsin ki, sabah da yanında olacaq. Bizim xalqlarımızın könül birliyi illərin sınağından çıxıb və bu gün də inkişaf etməkdədir".
Mürtəza
Ölkə.Az
