Ramin Bayramlı üçüncü dozanın hansı formada vurula biləcəyini açıqlayıb

"Ölkə.az" xəbər verir ki, bunu report-a açıqlamasında Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlı deyib. O, Azərbaycanın aparılan elmi tədqiqatları yaxından təqib etdiyini söyləyib:

"Ölkəmizdə özümüzün də apardığımız tədiqatlar var. Tədqiqatın nəticəsində vaksinasiyadan sonra yaranmış humoral immunitetin effektivliyinin nə qədər olacağını gözləyirik. 

İmmunitetin digər bir istiqaməti də var - hüceyrəvi immunitet. Bu istiqamətdə də dünyada tədqiqatlar aparılır. Bir çox ölkələrdən alınmış ilkin nəticələr göstərir ki, humoral immunitet zəifləsə də, yəni anticisimlər azalsa da, qanda hüceyrəvi immunitet-yaddaş hüceyrələri uzun müddət qalır. Bu çox yaxşı xəbərdir. Yaddaş hüceyrələri qalırsa, deməli, mütəmadi olaraq biz xatırlatmaq dozası vurmaqla onu təkrar aktivləşdirə bilərik. Bu baxımdan tədqiqatlara görə qərarlar qəbul ediləcək. Tədqiqatların nəticələri qısa müddətdə yekunlaşacaq. Çox yaxın günlərdə yəqin ki, qərarlar veriləcək.  Qərar verəcəyik ki, 2 doza “sinovac” alan başqa vaksin alsın və yaxud xəstəliyi keçirənlər nə qədər müddətdən sonra “xatırlatma doza” dediyimiz dozanı xəstəliyi keçirdikdən neçə ay sonra alsın və hansı vaksin olsa daha yaxşı olar. Bütün bunların qərarları çox qısa müddətdə veriləcək”.

Billurə Yunus