Müdafiə Nazirliyi azad olunan ərazilərdə aşkarlanan minaların sayını açıqlayıb
“Azad olunmuş ərazilərdə minalardan təmizləmə işlərinin sürətləndirilməsi və təhlükəsizlik tədbirlərinin gücləndirilməsi istiqamətində aparılan işlər də davam etdirilir”.
Ölkə.Az xəbər verir ki, bunu Müdafiə Nazirliyinin Mətbuat Xidmətinin rəis müavini polkovnik-leytenant Anar Eyvazov cari ildə ordu quruculuğu sahəsində görülən işlər və əsas istiqamətlər üzrə yerinə yetirilən tapşırıqlarla bağlı məruzə ilə çıxışında deyib. O bildirib ki, 2021-ci ildə mühəndis qoşunları tərəfindən azad olunan ərazilərdə nəqliyyat vasitələrinin təhlükəsiz hərəkətini təmin etmək məqsədilə yollar minalardan və qar örtüyündən təmizlənib:
“Həmçinin çətin keçilən ərazilərdə yerləşən bölmələrimizə, onların döyüş mövqelərinə yeni təminat yolları çəkilib.
2021-ci il ərzində 13 min hektar (ha) ərazi mina və partlamamış döyüş sursatından təmizlənib. Bu ərazilərdə aşkar olunan 17 minə qədər mina və partlamamış döyüş sursatı zərərsizləşdirilib”.
Billurə Yunus
