Bu qidalar maddələr mübadiləsini sürətləndirir

"Ölkə.az" xəbər verir ki, yaş artıqca bu mübadilə prosesi yavaşlayır. Lakin müəyyən vərdişlərə riayət etməklə, vitamin və minerallarla zəngin qidaları qəbul etməklə maddələr mübadiləsini sürətləndirmək mümkündür.

D vitamini

Yumurta sarısı, qızılbalıq və süd məhsulları D vitamini ilə zəngindir. Bu vitamin hormonları və qanda qlükoza səviyyəsini tənzimləyir, sümükləri möhkəmlədən kalsiumla təmin edir, immuniteti qoruyur, depressiya riskini azaldır.

Maqnezium

Maqnezium banan, qoz-fındıq, paxlalı bitkilər, ispanaq, taxıl, kartof və balıqda olur. Bədəndə maqnezium çatışmazlığı varsa, orqanizmin maddələr mübadiləsi yavaşlayır. Bu səbəbdən yuxarıda adı çəkilən qidaları qəbul etmək vacibdir. 

B vitamini

B vitamini ilə zəngin olan qidalar sırasına dəniz və süd məhsulları, yumurta, yağsız ət, qırmızı balıq, qəhvəyi düyü, balqabaq, qoz-fındıq, toxum, banan, alma və digər meyvə-tərəvəzlər daxildir. İmmunitet sistemini gücləndirmək, hüceyrə mübadiləsini tənzimləmək və qan şəkərinin səviyyəsini saxlamaq üçün bu vitaminin istehlakı mütləqdir.

C vitamini

C vitamini ispanaq, kələm, kartof, bibər, giləmeyvələrdə və bütün sitrus meyvələrində var. Bu vitamin hüceyrələri sərbəst radikalların təsirindən qoruyan, qocalma prosesini ləngidən, gəncliyin əsas zülalı olan kollagenin istehsalını stimullaşdıran, immunitet sistemini gücləndirən təbii antioksidantdır. Həmçinin C vitamini zülal, karbohidrat və xolesterin mübadiləsinə müsbət təsir göstərir.