İlahiyyatçı: "Bəlkə Hacı İbrahim elə yaxşı işlər görüb ki, Allah onu mükafatlandıracaq?"

"Həccə getmək üçün müsəlman ilk növbədə Allaha iman etməlidir. Buna görə həcc ziyarəti edən insan bütün haram və günahlardan çəkinməli, içki içmək, fahişəlik və sair bu kimi məsələlərə meyl etməməlidir. Ziyarətə gedib gələndən sonra da bu şeylərdən özünü qorumalıdır. Spirtli içki içmək qadağandır, haramdır. "Quran"da bu barədə üç ayə var".

Bu fikirləri Ölkə.az-a açıqlamasında iş adamı, “Avesta” konserninin rəhbəri hacı İbrahim Nehrəmlinin söylədiklərinə münasibət bildirən ilahiyyatçı alim Əkrəm Həsənov səsləndirib.

Qeyd edək ki, iş adamı a24.az saytına açıqlamasında həcc ziyarətindən sonra da spirtli içki qəbul etdiyini söyləmişdi:

“Həccə getməyimin məqsədi Allah evini ziyarət etmək idi. Hər bir imkanlı müsəlman kimi, mən də bu müqəddəs yolu getdim. Məkkədən gəldin, sonra şərabını iç də, o nə deməkdir ki? Mən, açığı, bu məsələyə etiraz eləmirəm və içirəm. Məkkəyə gedəndə də üzümü Allaha tutub bildirdim ki, mən şərab içəcəyəm. Mən iş adamıyam, Məkkədə içmirəm ki?! Gəlmişəm, Azərbaycanda içirəm də. Məkkədən gəlib, üstündən 40 gün keçəndən sonra 50 qram içki içmək o demək deyil ki, hacısan, içməməlisən. Belə qəbahət heç yerdə yoxdur. O adama içki haramdır ki, içib özünü apara bilmir və gedib nəsə eləyir. Həm də içki içməmək də o demək deyil ki, sən pak adamsan. Pak adam insanlara hörmət, qayğı göstərməyi, maddi yardım etməyi bacarmalıdır. Yoxsa, hacı olum, gəlib burada oğurluq edim, baş kəsim, yenidən bir də gedim Allah evinə, deyim ki, qurbanın olum, günahımdan keç… Məgər Məkkə günah yumaq yeridir? Mən Azərbaycanda 5 məscid tikdirmişəm. Hələ Məkkəyə getməmişdən əvvəl hamı mənə “hacı” deyə müraciət edirdi. Sonradan həccə getdim. Bu, o demək deyil ki, mən Məkkəyə gedib-gələndən sonra içməməliyəm. Məgər şərab içmək Allahsızlıqdır? İçkini hamı içə bilər. Mən də hər gün 100 qram şərab içirəm”.

Ə.Həsənov bildirib ki, kimsə nəfsini saxlaya bilməyib içki içirsə, bunu din adına bağlamaq yanlışdır:

"Spirtli içki haram buyrulduqdan sonra Peyğəmbərimizin yanındakı səhabələr də evlərindəki içkiləri birdəfəlik atdılar, heç vaxt içmədilər. Alimlər də buna əsasən deyirlər ki, spirtli içki içmək haramdı. İnsan öz nəfsini saxlaya bilmirsə, bunu islamın adına yazmaq düzgün deyil".

İlahiyyatçı hacı dini titulunun olub-olmamasından da danışıb:

"Hacı sözünü işlətmək düz deyil. Bütün islam alimləri yekdil qərara gəliblər ki, bu söz ancaq ziyarət zamanı istifadə oluna bilər. Ziyarətdən sonra hacı müraciəti etmək doğru deyil. Ümumiyyətlə, ziyarətdən sonra içki içmək və bunu söyləmək də günahdır. Çünki başqalarına pis örnək olursan. O insan Allahdan bğaışlanmağını istəməli, səhvini etiraf etməlidir. Amma ola bilər ki, o, elə yaxşı işlər görüb ki, Allah onu mükafatlandıracaq. Yəni kimin cəzalanıb cəzalanmayacağını yalnız Allah bilir".

İntiqam VALEHOĞLU
Ölkə.az