Partiya sədri: "Ermənistanda baş verənlər Rusiyanın ziyanınadır"

Ermənistanda kütləvi aksiyalar davam edir.

Bir neçə gündü Ermənistanda xalq ayağa qalxıb aksiyalar etsə də Ermənistanda heç bir siyasi partiya aksiyaçılara dəstək vermir. Rusiya olaylarda ABŞ-ı günahlandırır, ABŞ-ın Ermənistandakı səfiri Riçard Mills isə bildirib ki, baş verənlərlə ABŞ-ın heç bir əlaqəsi yoxdur.

Ermənistanda baş verənləri ASDP sədri Araz Əlizadə Ölkə.az-a şərh edib.

Araz Əlizadə: "Rusiyanın burada heç bir marağı yoxdur ki, kütləvi ixtişaşlar etsin. Hətta Rusiya erməni millətçilərini sakitləşdirmək üçün məcbur oldu 200 milyon dollarlıq Ermənistana silah bağışladı. Rus əsgəri Ermənistan ərazisində cinayət törətmişdi, onu Rusiya qanunları ilə Rusiyada mühakimə etməli idilər, ancaq onu ermənilərə verdilər ki, ermənilərin ağzı yumulsun. Bu hadislərdə Rusiyaya xeyir gətirən heç nə yoxdur. İlk dəfədir ki, erməni əhalisi Rusiyaya qarşı çıxır.

Ermənilərin etdiyi son olaylar strateji baxımdan ABŞ-a sərf edir. Rəngli inqilabların hamısının arxasında ABŞ dayanıb. Baş verən son hadisələrə heç bir siyasi partiya qoşulmadı, siyasi təşkilatlardan dəstək verən olmadı. Bunun da səbəbi ondadır ki, Rusiyaya qarşı çıxan siyasi qüvvənin gələcəyi yoxdur. Çünki Ermənistan iqtisadiyyatının 96%-i Rusiyanın əlindədir. Belə çıxır ki, ermənilərə çörək verən elə Rusiyadır. ABŞ pul verib müəyyən insanları küçəyə çıxarda bilər, bu əsasən cavanlardır. ABŞ gələcək üçün platforma hazırlayır.

Ermənistanda dəyişiklik olması üçün ancaq Acariya variantı olmalıdır. Putin təyyarə göndərməlidir, Serjiki və ətrafındakıları bir yerdə doldurub təyyarəyə aparsın Rusiyaya. Bu aksiyalarda udan tərəf elə Sarkisiyandır. Ola bilsin baş verən bu olayların arxasında Sarkisiyan özü durur. Səbəb ondadır ki, Rusiyanın başı digər regionlara qarışmışdı, Ermənistana o qədər də fikir vermirdi. Boş yerdən Sarkisiyan həm Rusiya ilə münasibətləri canlandırdı, həm də 200 milyon dollarlıq silah əldə etdi".

Səxavət Məmməd
Ölkə.az