Təşkilat sədri: "İftiralar səmərə vermədi"
“Birinci Avropa Oyunlarının Azərbaycanda keçirilməsinə qarşı Qərb dairələrinin böyük sevinclə başlatdıqları anti-Azərbaycan kampaniyası elə arzu olaraq maraqlı qüvvələrin gözündə qaldı. Qonaqların qarşılanmasından yarışların yüksək səviyyədə keçirilməsinə qədər yaradılmış bütün şərait ölkəmizə olan haqsız qərəzi və çirkinlikləri alt-üst etdi”.
Bunu “Bakı 2015” I Avropa Oyunlarında fəallığı ilə seçilən “Aztelekom” İB YAP Gənclər Təşkilatının sədri Emil Rzayev deyib. O bildirib ki, əslində belə də olmalı idi. Çünki Azərbaycan qısa müddət ərzində həm siyasi, həm iqtisadi inkişaf modelinə görə, dünya dövlətlərinə nümunə olacaq bir inkişaf yolu keçib. “Azərbaycan öz güclü liderinin sayəsində səsi eşidiləcək və tanınacaq suveren bir dövlətdir. Bütün qarayaxmalara baxmayaraq Azərbaycan güclü siyasi iradə göstərdi və neçə nəsil bundan sonra da xatırlanacaq bir ilkə imza atdı. Bütün dünyaya subut olundu ki, xalq və hakimiyyət bir yerdədir. Avropanın 50 ölkəsi bu yarışlarda təmsil olundu. Əslində bu oyunlarda Azərbaycandan çox Avropa qazandı. Azərbaycan Birinci Avropa oyunlarını yüksək səviyyədə keçirməklə yeni bir standart müəyyənləşdirdi. Əsası Bakıda qoyulan bu standartlar gələcəkdə keçiriləcək bir çox mötəbər yarışlar üçün çox səliqəli və səlis cızılmış bir standart oldu. Bakıda dünya üçün tarix yazıldı. Arzular reallığa çevrildi. I Avropa Oyunlarının istər açılışı, istər oyunların davam etdiyi 17 gün və bağlanış mərasimi birmənalı şəkildə Azərbaycan dövlətinin gücünün, qüvvətinin nümayişi oldu. Biz mədəniyyətimizi, tariximizi, qonaqpərvərliyimizi dünya xalqlarına çox dəyərli şəkildə təqdim edə bildik. Gənclərə olan qayğı öz nəticəsini göstərdi. Avropanın idman ölkələri sayılan dövlətləri də geridə qoyaraq 2-ci yeri tutduq. 21 qızıl, 15 gümüş, 20 bürünc medal qazandıq. Əslində bu rəqəmlərin arxasında gənclərə və idmançılara yaradılan yüksək şərait durur. Bu qələbələr cənab prezidentimiz İlham Əliyevin həm ölkə başçısı, həm də Milli Olimpiya Komitəsinin prezidenti kimi daim gəncliyə dəstəyinin nəticəsidir. Artıq Azərbaycan dünyəvi yarışlara hazır olduğunu sübuta yetirdi. Əksər Avropa dövlətləri belə mötəbər yarışların öz ölkələrində keçirilməsin istəyirlər. Ancaq Azərbaycan bunu reallaşdırdı. Ölkəmiz bu oyunları keçirməklə böyük idman ölkəsi olduğunu təsdiqlədi”.
Ölkə.az