Cabir İmanov: Minlərlə tamaşaçının himnimizi oxuması birliyimizi daha da gücləndirdi
Baku2015 İlk Avropa oyunları başa çatdı. Allaha şükür edirəm ki, bu cür möhtəşəm silsilə tədbirlərin şahidi oldum və bu prosesdə Baku 2015 İlk Avropa oyunlarının səfiri və məşəldarı kimi yaxından iştirak etdim.
Bununla qürur duyuram. Buna görə Dövlət Başçısına və Avropa Oyunlarının Təşkilat Komitəsinin rəhbərliyinə təşəkkürümü bildirirəm. Oyunların açılış və bağlanma mərasimindən xüsusi zövq aldım. Bir neçə idman yarışlarında ölkəmizə ilk dəfə qeyri-adi hisslərlə ailə üzvlərimlə birlikdə azarkeşlik etdim.
Bu sözləri Baku 2015 İlk Avropa Oyunlarının səfiri və məşəldarı, tanınmış KVN-çi Cabir İmanov bildirib.
Onun sözlərinə görə, Azərbaycan Dövlət Himninin minlərlə tamaşaçı tərəfindən dəfələrlə birlikdə ucadan oxunması bizim birliyimizi daha da möhkəmləndirdi:
“Cənab prezidentimiz İlham Əliyev, ölkəmizin birinci xanımı Mehriban Əliyeva və bu işdə əziyyəti olan bütün insanlar dünyaya sübut etdilər ki, Azərbaycan inkişaf etmiş digər ölkələrdən irəlidədir. Azərbaycanın paytaxtı Bakı şəhəri dünyanın ən gözəl şəhəridir. Velosiped yarışlarının çəkilişi zamanı, Bakımızın biri birindən gözəl məkanlarını bütün dünya gördü.
İdman kompleksləri, xüsusilə də Bakı Olimpiya stadionu böyük alqış və təriflərə layiqdir. Minlərlə könüllü gənclər Baku 2015 Avropa oyunlarının təşkilat prosesində canla başla təmənnasız işləyib, Vətənə olan sevgilərini göstərərək, baxmayaraq ki, ilk dəfə bu işi görürdülər, peşəkarcasına qarşıda duran bütün vəzifələrin öhdəsindən layiqincə gəlmişdirlər.
Gənclər və İdman nazirliyinin bütün əməkdaşları, başda Azad Rəhimov olmaqla, uzun müddət ərzində gördükləri işlər göz qabağında idi. Bütün idman federasiyalarının rəhbərlikləri, məşqçilər idmançılarımıza maddi və mənəvi dəstək göstərməklə, bu və bundan qabaq olan qələbələri əldə etmək üçün əllərindən gələni ediblər.
O ki qaldı İlk Avropa oyunlarının Azərbaycan idmançılarına, demək istəyirəm ki, siz hamınız nömrə birsiniz, əziyyətiniz hədər yerə getmədi, halal olsun sizə, sizin məşqçilərinizə, valideynlərinizə. Siz Azərbaycanın fəxrisiniz.
56 medal - 21 qızıl, 15 gümüş və 20 bürünc medallar hamınızın qələbəsidir. Azərbaycanın qələbəsidir. Mən hamımızı bu böyük idman bayramı münasibətilə təbrik edirəm. Yaşasın Azərbaycan!”.
Ölkə.Az
