Laçınla çoxdan vidalaşmışıq, Qazaxın kəndləri və Kərki təhvil verilir - Şahnazaryan
“Sosial şəbəkələrdəki yazıları oxuyuram və başa düşürəm ki, insanlar Laçın, Ahavno və Susla vidalaşır. Daha doğrusu, belə düşünür. Düşünür ki, bu qəsəbələrlə vidalaşır. Həqiqətən yox. İndiki davranışımızla Ermənistanın Tavuş bölgəsindəki kəndlərlə (Qazaxın işğal altında olan Sofulu, Barxudarlı, Boğanıs Ayrım, Qızıl Hacılı, Aşağı Əskipara, Xeyrimli kəndləri- red) və Naxçıvana məxsus Tiqranaşenlə (Kərki kəndi-red) vidalaşırıq”.
“Ölkə.Az” xəbər verir ki, bu barədə “Voskanapat” analitik mərkəzinin rəhbəri, politoloq Qrant Melik-Şahnazaryan öz Facebook səhifəsində yazıb.
O qeyd edib ki, Laçın və Axavno bu gün təslim edilmir.
“Onlar 10 noyabr 2020-ci il Ermənistanın kapitulyasiya aktı ilə təhvil verilib. Bu qəsəbələrdə soydaşlarımızın yaşamasına icazə verilməsi, hələ heç nə demək deyil. Onların təhlükəsizliyinin təminatçısı kimdir? Ermənistan ordusu? Əlbəttə, yox. Onda biz nədən danışırıq?
Əslində, ağrılı sətirlər yazıram. Amma bunu demək lazımdır. Bizim ictimaiyyət həmişə real siyasi proseslərdən bir neçə addım geridə saxlanılır. Biz Laçınla vidalaşarkən gündəmdə digər erməni yaşayış məntəqələri məsələsi müzakirə olunur”, - o qeyd edib.
Mürtəza
Ölkə.Az
