İcra Hakimiyyəti 1 milyonluq yaşıllaşdırma işləri alır

İcra Hakimiyyəti 1 milyonluq yaşıllaşdırma işləri alır - MÜƏMMA

Sumqayıt Şəhər İcra Hakimiyyəti Mənzil-Kommunal Təsərrüfatı İstehsalat Birliyinin Yaşıllaşdırma İdarəsi yaşıllıqların salınması işlərinin satın alınması məqsədilə elan etdiyi açıq tenderə yekun vurub.

“Ölkə.Az”ın məlumatına görə, tenderin qalibi “Azstandart-T” MMC olub. Qalib təşkilatla 292,050 min manat məbləğində satınalma müqaviləsi imzalanıb.

Qeyd edək ki, qurum ötən ay da yaşıllıqların salınması işlərinin satın alınması ilə bağlı tender keçirmiş, “Vahid” MMC ilə 296,475 min manat məbləğində tender müqaviləsi imzalamışdı.

Bütövlükdə isə ilin əvvəlindən bu yana qurum eyni tender predmeti üzrə 4 tender keçirib ki, ilin əvvəlində bu tenderlərdən ikisinin qalibi “Astroit” MMC olub və şirkətə müvafiq olaraq 147,500 min manat və 243,080 min manat ödənilib.

Onu da qeyd edək ki, “Astroit” MMC-nin qanuni təmsilçisi Hüseynov Sehran İmran oğlu, idarənin ötən ilin sonunda yaşıllaşdırma ilə bağlı 176,882 min manatlıq tender verdiyi “Arsenal-M” MMC-nin qanuni təmsilçisi isə Hüseynova Vüsalə Sehran qızıdır. Bu isə iki şirkət rəhbərinin bir ailə üzvü olması ilə bağlı şübhələr yaradır.

Könül
Ölkə.Az