Narkotik satışında təqsirləndirilən Gəncə sakini 8 il cəza aldı

Bakı Ağır Cinayətlər Məhkəməsində Gəncə ş. sakini Vasif Quliyevin (1978-ci il təv.) CM-nin 234.4.3-cü (satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama) maddəsi ilə təqsirləndirilməsinə dair cinayət işi üzrə məhkəmə prosesi yekunlaşıb.

Ötən il dekabrın 2-də Abşeron RPŞ əməkdaşları daxil olan əməliyyat məlumatı əsasında Mehdiabad qəsəbəsində Vasif Quliyevi saxlayıblar. Polis şöbəsinə gətirilən şəxsin əlindəki bağlamadan 2 kq 300 qram marixuana aşkar edilib.

Dindirmə zamanı Vasif Quliyev bildirib ki, yabanı halda bitmiş narkotik vasitənin bir hissəsini çay dəmləyib içmək məqsədi ilə Şəmkir rayonu ərazisində yol kənarından yığıb. “Həmin yeri haradan tanıyırsız?” sualına Quliyev “orada nəşə bitməsini bütün Gəncə bilir” deyə cavab verib.

Onun sözlərinə görə, o, cəmi 300 qram yığıb, bir müddət sonra tanışı həmin malı satmağı təklif edib, o isə əvvəl razılaşmayıb, deyib ki “mən ikinci dəfə sroka getmək istəmirəm”. Lakin günlərin bir günü həmin şəxs onu dilə gətirib. Vasif Quliyev vurğulayıb ki, o, çantaya yığdığı 300 qramdan az miqdarda istifadə olunan marixuananı qoyub, amma bilməyib ki, tanışı guya öz paltarının əvəzinə ora əlavə 1-2 kq nəşə yerləşdirib. Mehdiabad qəsəbəsinə çatanda da, həmin şəxs paketi ona verib və deyib:

“Bu dəqiqə taksinin pulunu verib gəlirəm”.

Elə o vaxt onu polislər saxlayıblar. 

Məhkəmənin hökmü ilə Vasif Quliyev 8 il müddətinə azadlıqdan məhrum edilib. (oxu.az)

Ölkə.Az