Bir ildə İstanbul Kapalıçarşını 40 milyona yaxın insan ziyarət edib - FOTO

İstanbulun tarixi alış-veriş və ticarət mərkəzi olan Kapalıçarşı, 2022-ci ildə restavrasiyadan sonra 39 milyon 766 min 801 nəfər tərəfindən ziyarət edilib. “Ölkə.Az” xəbər verir ki. içəridən labirintə bənzəyən bu möhtəşəm obyekt, tekstildən antikvarlara qədər hər cür məhsulun satıldığı minlərlə dükanı özündə birləşdirir və əsrlərdir ən sıx alış-veriş məkanıdır. Minlərlə işçisi və müştərisi ilə kiçik bir şəhəri xatırladan qapalı bir kompleks olan Kapalıçarşı, keçən il aparılan restavrasiyadan sonra yenilənmiş quruluşu ilə yenidən öz qonaqlarını qəbul etməyə başlayıb. 2021-ci ildə 25,5 milyon olan Kapalıçarşı ziyarətçilərinin sayı, 2022-ci ildə 56% artaraq 40 milyona çatıb. Bu rəqəmlə keçən il Kapalıçarşıyı orta hesabla 100 min adam ziyarət edib. İstanbulda Nuruosmaniye, Mercan və Beyazıt arasında yerləşən Kapalıçarşının tarixi 15-ci əsrin ortalarından başlayır. İstanbulun ən əhəmiyyətli rəmzlərindən biri olan Kapalıçarşının təməli, 1461-ci ildə Fatih Sultan Mehmetin Ayasofyaya gəlir gətirmək üçün inşa etdirdiyi tikililərlə qoyulub. Zamanla bölgənin ən əhəmiyyətli ticarət mərkəzinə çevrilən Kapalıçarşı,dünyanın hər yerindən gətirilən zərgərlik məmulatlarının və qiymətli metalların ticarətinin aparıldığı və emal edildiyi mühüm maliyyə mərkəzi kimi xidmət etməyə başlayıb. Dünyanın nəinki ən qədim, həm də ən böyük ticarət mərkəzi olaraq qəbul edilən Kapalıçarşı, müxtəlif yanğın və zəlzələlərdən sonra məşhur memarlar tərəfindən dəfələrlə təmir edilib. Tarixi və mədəni əhəmiyyətə malik olan Kapalıçarşı dünyanın ən çox ziyarət edilən tarixi bazarlarından biri kimi də diqqət cəlb etməkdə davam edir. Unutmayın, Kapalıçarşıda alış-verişin ilk qaydası "Endirim almaqdır!" 500 illik müddətdə edilən əlavələrlə, hazırda 2500-ə yaxın iş yerinə ev sahibliyi edən tarixi Kapalıçarşıda xalçadan çantaya, tekstildən qızıl-gümüş zinət əşyalarına, əntiq əşyalardan kirəmitlərə qədər saysız-hesabsız məhsul tapa bilərsiniz. Kapalıçarşı yayda 08.30-19.30, qışda isə 08.30-19.00 arası açıqdır. Mükəmməl məhsul və ya əşya axtararkən, Kapalıçarşının dolanbac küçələrində və keçidlərində etdiyiniz maraqlı gəzinti, sizi valehedici mağazalar, eləcə də çoxsaylı kafe və restoranlarla qarşılaşdıracaqdır. Kapalıçarşıya səfəriniz zamanı bazarda alış-verişin qızıl qaydasını heç vaxt unutmayın: “Hər alış-verişdə endirim istəyin”!