Paşinyan Kremlin təhdidlərinə əhəmiyyət vermir: Rusiya radikal addımlara məcbur qalıb
Avropa Birliyinin Ermənistandan Rusiyanın regional mövqelərini zəiflətmək üçün alət olaraq, istifadə etməsi artıq çox təhlükəli situasiya yaratmağa, silahlı toqquşma ehtimalına inandırıcı görüntülər verməyə başlayıb... Kreml Rusiyadan Qərbə doğru “qaçmağa” çalışan rəsmi İrəvana Ermənistanda avropalı müşahidəçilərin deyil, məhz KTMT təmsilçilərinin yerləşdirilməsi üçün təzyiqlərini açıq müstəviyə keçirib...
"Ölkə.az" musavat.com-a istinadla bildirir ki, Rusiya-Ermənistan münasibətlərinin son həddə qədər gərginləşdiyi artıq inkaredilməz reallıqdır. Son günlər bu iki hərbi müttəfiq arasındakı gərginlik hətta açıq siyasi müstəviyə də çıxıb. Belə ki, rəsmi İrəvanın davranışları Kremldə qıcıq doğurmaqdadır. Və Rusiyanın siyasi dairələri Ermənistanı açıq hədəf alan açıqlamalarla diqqəti çəkirlər.
Onu da qeyd etmək lazımdır ki, Kremlə yaxın siyasi dairələr baş nazir Nikol Paşinyanın “Rusiya ilə müttəfiqlik Ermənistanın təhlükəsizliyini təmin etmir, əksinə, daha ciddi təhdidlərə yol açır” açıqlamasından təəccübləndiklərini qətiyyən gizlətmirlər. Onlar hesab edirlər ki, bu açıqlama Rusiyaya münasibətdə olduqca açıq və ciddi hörmətsizlikdir. Eyni zamanda, erməni baş nazirin Avropa Birliyi müşahidəçilərinin ölkəyə çağırılmasını Qərbə Ermənistanın Rusiya ilə birlikdə Azərbaycana qarşı hücum etməyəcəyinə təminat verilməsi ilə arqumentləşdirməyə çalışması da Rusiyada ciddi qıcıq yaradıb.
Maraqlıdır ki, son vaxtlar Rusiya rəsmiləri Paşinyan hakimiyyətini açıq mətnlə təhdid etməyə başlayıblar. Onların əsas tezisi ondan ibraətdir ki, əgər, rəsmi İrəvan Qərbin xeyrinə seçim edərsə, bu, Ermənistan üçün geopolitik intihar anlamı daşıyacaq. Hətta Rusiya Dövlət Dumasının spikeri Vyaçeslav Volodin də onların sırasına qatılıb. O, bildirib ki, Qərb qurumlarının, o cümlədən də, Avropa Parlamentinin və AŞPA-nın Cənubi Qafqazdakı proseslərə cəlb edilməsi yolverilməzdir.
Dövlət Dumasının spikeri Vyaçeslav Volodin Ermənistanın siyasi rəhbərliyinə xəbərdarlıq etməyi də unutmayıb: “Qərb qurumlarının müdaxiləsi ucbatından Yuqoslaviya, Suriya, Ukrayna və s. ölkələrin sonrakı taleyinin necə olduğu məlumdur. Cənubi Qafqazdakı problemlər Azərbaycan, Rusiya və Ermənistan liderlərinin imzaladıqları üçtərəfli anlaşmalarla həll edilməlidir. Həmin amlaşmaları mütləq icra etmək lazımdır. Ancaq bunun əvəzinə Avropa qurumlarını regiona cəlb etməyə çalışanlar, sadəcə, ölkələrini itirə bilərlər”.
Təbii ki, rusiyalı spikerin bu açıqlaması ilk növbədə Ermənistana yönəlik üstüörtülü təhdiddir. Rusiya təmsilçisi Kremlin Cənubi Qafqazda öz təsir mexanizmlərini qorumaq üçün ən radikal addımları atmaqdan belə, qətiyyən çəkinməyəcəyinə eyham vurur. Bu isə odeməkdir ki, Kreml Rusiyanın regional mövqelərini ABŞ və Qərbə təhvil vermək niyyətindən uzaqdır.
Onu da qeyd etmək lazımdır ki, Kreml son vaxtlar KTMT-nın xüsusi missiyasının Ermənistana yerləşdirilməsində də israrlı davranır. Rusiya Avropa Birliyi missiyasının Ermənistana yerləşdirilməsinə qarşı olduğunu hər imkanda biruzə verir və bu məsələnin KTMT-nın xeyrinə həll edilməsinə yönəlik çağırışlar edir. Üstəlik, Kreml Avropa Birliyi missiyasının gəlişinə rəsmi Bakının qarşı çıxdığını da xatırladır. Və bununla da baş nazir N.Paşinyanın avropalı müşahidəçilərin Ermənistana yerləşdirilməsini Azərbaycanın narahatlığı ilə arqumentləşdirilməsinin yersiz olduğunu qabardır.
Maraqlıdır ki, Kremlin rəsmi İrəvana qarşı təzyiqlərinə KTMT Birləşmiş Qərargahının rəisi, general-polkovnik Anatoli Sidorov da qatılıb. O, bildirib ki, Ermənistanın da daxil olduğu KTMT-nın məsuliyyət zonasında situasiya qəliz və gərgindir: “Qərb ölkələrinin KTMT ətrafında və onun ayrı-ayrı üzvləri daxilində sabitliyi pozan destruktiv fəaliyyəti indi əsas təhlükədir. KTMT öz hərbi müttəfiqi Ermənistana dəstək verməyə hazırdır”.
Göründüyü kimi, KTMT generalı rəsmi İrəvana ABŞ və Qərbin vəziyyəti gərginləşdirdiyini anlatmağa çalışır. Əslində, bu açıqlama Qərb ölkələrinin regiona gələcəyi təqdirdə, KTMT ilə müəyyən qarşıdurma ehtimalının olduğuna eyhamdır. Və rus general dolayısı təhdidlə yanaşı, Paşinyan hakimiyyətinə belə qarşıdurma təhlükəsindən yayınmağın yeganə yolu kimi KTMT təmsilçilərinin Ermənistana yerləşdirilməsini məsləhət görür.
Onu da qeyd edək ki, İsrailin keçmiş rabitə və kibertəhlükəsizlik naziri Ayub Kara da Avropa Birliyi missiyasının Ermənistana yerləşdirilməsinin onsuz da gərginliyin olduğu regionda sabitliyi poza biləcəyini düşünür. Onun fikrincə, regionda silahlı toqquşmalar hər an bərpa oluna bilər: “Ona görə də, Avropa Birliyinin Ermənistandan Rusiyanın regional təsirlərini zəiflətmək üçün alət olaraq, istifadə etməsi çox təhlükəlidir. Rusiya da Ermənistanda hərbi bazaya malikdir, üstəlik, Kreml rəsmi İrəvandan sanksiyalardan yayınmaq məqsədilə yararlanır. Ancaq Avropa Birliyinin Rusiya üzərində təsir üstünlüyü qazanmaq cəhdləri gərginliyi artıra bilər”.
Nə qədər qəribə də olsa, Kremlin Ermənistana yönəlik son ittihamları rəsmi İrəvan tərəfindən Avropa Birliyinin təzyiqlərinə eyham kimi qəbul edilməkdədir. Ona görə də, Ermənistan Təhlükəsizlik Şurasının katibi Armen Qriqoryan bildirib ki, Avropa Birliyi müşahidə missiyası göndərmək üçün rəsmi İrəvana heç bir təzyiq göstərməyib: “Avropa Birliyi müşahidəçilərinin Ermənistana çağırılması ölkə rəhbərliyinin qərarı ilə baş verməkdədir. Əsas məqsəd Ermənistan üçün əlavə təhlükəsizlik təminatı yaratmaqdan ibarətdir”.
Belə anlaşılır ki, rəsmi İrəvan Kremlin qıcıqlanmasına və Ermənistanı təhdid etməsinə o qədər də ciddi əhəmiyyət vermir. Rəsmi İrəvan Rusiyanın deyil, məhz Avropa Birliyinin təhlükəsizlik mexanizmlərinə sığınmağa can atır. Paşinyan hakimiyyəti məhz Qərbin xeyrinə qəti qərarını vermiş kimi görünür və mövqeyini dəyişmək niyyətindən uzaqdır. Belə vəziyyətdə Rusiyanın Ermənistana münasibətdə təhdidləri bir kənara buraxaraq, konkret radikal addımlar atmaqdan başqa çıxış yolunun qalmadığını da düşünmək olar.
