İcra hakimiyyəti kənd sakinlərini hədələdi

Saatlı rayon icra hakimiyyəti Azadkənd camaatının şikayətlərinə baxıb, məsələni həll etmək əvəzinə şikayətçilərə təzyiq edir ki, təkzib versinlər.

Ölkə.az-a bir qrup Saatlı rayon Azadkənd kənd sakini şikayət ərizəsi yazaraq bildirmişdi ki, icra başçısı kənd sakinlərinin əkin sahələrini yararsız vəziyyətə qoyub.

Şikayətçilər qeyd etmişdilər ki, icra başçısı kəndin çölündə yerləşən və kəndin qrunt sularının axdığı gölü Bakı şəhərində yaşayan Bəhram adlı şəxsə satıb. Kəndin qrunt suları bu gölə yığılır, göldən isə birbaşa Mil-Muğan kollektoruna axırmış. Bəhram isə gölü balıq vətəgəsinə döndərərək Mil-Muğan kollektoruna axınının qarşısını alıb. Amma indiyə qədər bu vətəgədə heç balıq da saxlamayıb.

Ölkə.az Saatlı rayon Azadkənd sakinlərinin şikayəti ilə maraqlanıb və 21.08.2015 tarixində ""Torpaq Siracəddin", "balıq Bəhram" və Saatlının ruzisiz qalmış kəndliləri"" başlıqlı yazı dərc edib.

Yazı saytda çıxdıqdan sonra məsələni aydınlaşdırmaq üçün Ölkə.az olaraq Saatlı rayon icra hakimiyyəti başçısının birinci müavini Quliyev İlhamla əlaqə yaratdıq. Başçının birinci müavini məsələnin məğzinin nə olması ilə maraqlanmadan əvvəlcə şikayətçilərin adlarını soruşdu. İlham müəllimə saytda dərc olunan yazını oxumağı məsləhət görəndən sonra isə o, maraqlanacağını deyib dəstəyi asdı. Saytımızda dərc olunan materialı oxuduqdan sonra, materialda adı keçən bütün şikəyətçilərdən icra nümayəndəsi vasitəsi ilə təkzib verməyi tələb edən Siracəddin müəllimin birinci müavini onlara təzyiq göstərməyə başlayıb.

Bu gün redaksiyamıza daxil olan məlumatda bildirilir ki, İlham Quliyev məsələ ilə maraqlanıb, ancaq tamam başqa formada. Kəndlinin problemini həll etmək əvəzinə şikayət məktubunu yazan sakinlərdən məsələnin yalan olması barədə mətbuata dərhal təkzib vermələri tələb olunub. Təbii ki, ruzisiz qalan kənd sakinləri problemləri həll olunmayınca icra hakimiyyəti işçilərinin hədələrinə əhəmiyyət verməyiblər.

Məsələni diqqətdə saxlayırıq.

Səxavət Məmməd
Ölkə.az