Bu qərar vətəndaşlarımıza küllü miqdarda ziyan vura bilər - AÇIQLAMA

Nəqliyyat sahəsi üzrə ekspert Eldəniz Cəfərli “Ölkə.Az”a açıqlamasında artıq xarici ölkələrdən sifariş verilmiş, yaşı 10 ildən artıq olan avtomobillərin taleyindən də danışıb. Belə ki, bu avtomobillərin ölkəyə gətirilməsi minimum 2 ay vaxt tələb etsə də, qərar 30 gündən sonra qüvvəyə minir.

Ekspertin sözlərinə görə, hazırda vətəndaşlarımızın xarici ölkələrdən aldığı minlərlə avtomobil var ki, onlar hələ də yoldadır:

“Bunlar Yaponiya, Cənubi Koreya, ABŞ kimi uzaq ölkələrdir. Oradan gəmi vasitəsilə avtomobillərin gətirilməsi minimum 2-3 ay vaxt tələb edir. Dövlət bütün bunları və özünün sosial yönümlü siyasətini nəzərə alaraq 30 gün müddətini 60 günə qədər uzatsa, daha yaxşı olar ki, vətəndaşlarımızın sifariş etdiyi və ödənişini həyata keçirdiyi avtomobillər ölkəyə daxil ola bilsin. Təklifimiz artıq sifariş edilmiş və pulu ödənilmiş avtomobillərin ölkəyə buraxılmasının təmin edilməsi, yaxud qərarın tətbiqi müddətin azı 60 günə qədər uzadılmasıdır”. 

“Əks təqdirdə həmin avtomobillər Gürcüstan limanlarında qala bilər ki, bu da vətəndaşlarımıza və sahibkarlarımıza küllü miqdarda ziyan vura bilər”, - deyə E.Cəfərli əlavə edib. 

Könül
Ölkə.Az