“National Geographic Azərbaycan” jurnalı beynəlxalq sərgidə iştirak edəcək
2015-ci il, 16-18 sentyabrda IV Bakı Beynəlxalq Kitab Sərgi-Yarmarkası keçiriləcəkdir.
Ölkə.Az xəbər verir ki, Bakı İdman Sarayında (Əl Oyunları İdman Sarayı) keçiriləcək tədbirin təşkilatçısı Azərbaycan Respublikası Mədəniyyət və Turizm Nazirliyidir.
Sərgi-yarmarkada xarici dövlətlərin nəşriyyat və müəllifləri iştirak edəcək, müxtəlif nəşrlərin nümayişi və satışı həyata keçiriləcəkdir.
“National Geographic Azərbaycan” jurnalının da sərgi-yarmarkada iştirakı planlaşdırılır. Ziyarətçilər bir ildir ki, Azərbaycanda fəaliyyət göstərən jurnal barədə geniş məlumat əldə edəcək, o cümlədən dərginin əhatə etdiyi mövzular, fotoşəkillər və yerli rubrikalarla yaxından tanış olacaqlar.
Xatırladaq ki, “Garant Media Holding” ilə “National Geographic” Cəmiyyəti arasında 2014-cü ilin mart ayında imzalanmış müqaviləyə əsasən, “National Geographic Azərbaycan” jurnalı 1 sentyabr 2014-cü ildən etibarən doğma dilimizdə nəşr edilərək oxuculara təqdim edilmişdi.
Əlavə olaraq qeyd etmək istərdik ki, 2014-cü il 12 noyabrdan “Garant Media Holding” və “National Geographic” Cəmiyyəti arasında “National Geographic Kids” uşaq jurnalının da Azərbaycanda dərc olunması ilə bağlı müqavilə imzalandı. 6-14 yaşlı uşaqlar üçün nəzərdə tutulmuş jurnal 2015-ci ilin fevral ayından etibarən ölkəmizdə nəşr edilir.
Ölkə.Az