Azərbaycanda qadın sahibkarların sayı artıb
"Ölkə.Az" xəbər verir ki, bunu Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov deyib. O bildirib ki, bununla yanaşı hüquqi şəxslərin və müəssisələrin təsisçiləri və idarəediciləri sırasında kifayət qədər sayda qadınlar təmsil olunur. Eyni zamanda, ölkəmizdə iqtisadi fəal əhlinin 49%-ni qadınlar təşkil edirlər.
KOBİA sədrinin sözlərinə görə, araşdırmalar və sorğuların təhlili göstərir ki, məlumatların əldə edilməsi, biznes bacarıqlarının çatışmazlığı, maliyyə resurslarına məhdud çıxış, satış imkanlarının azlığı qadın sahibkarların daha çox üzləşdiyi çağırışlardır:
"Qeyd olunanlar nəzərə alınmaqla ötən dövrlərdə KOBİA tərəfindən bir sıra dəstək mexanizmləri yaradılıb. Belə ki, qadınlar biznes fəaliyyətinə başlamaq və sahibkarlıq fəaliyyətini genişləndirmək üçün Agentliyin təlim, məsləhət, qrant proqramı, sərgilərdə iştirak, iri ticarət şəbəkələrinə çıxış, daxili bazar araşdırması, “Startap” şəhadətnaməsi və s. alət və xidmətlərindən yararlanırlar. KOBİA-nın strukturuna daxil olan KOB İnkişaf Mərkəzləri tərəfindən 2023-cü il ərzində keçirilən təlimlərdə 1000-ə yaxın qadın sahibkar və sahibkarlıq fəaliyyətinə başlamaq istəyən qadın yararlanıb. Ötən müddət ərzində 9 qadın sahibkara təqdim etdikləri layihə çərçivəsində qrant, 10-dan artıq qadın sahibkara 3 il müddətinə innovasiya fəaliyyətindən əldə etdikləri gəlirlər üzrə mənfəət və gəlir vergisindən azad edən “Startap” şəhadətnaməsi verilib".
Könül
Ölkə.Az
