Günahkar vətəndaş, yoxsa qurumlardır? - "Hər həftə sonu zibil dolu olur"

“Ölkə.Az” xəbər verir ki, ötən gün də mövcud vəziyyətlə bağlı sosial şəbəkələrdə videolar paylaşılıb.

Videodan su kanalının zibilliyə çevrildiyini, yararsız vəziyyətə düşdüyünü görmək mümkündür.

Məsələ ilə bağlı “Meliorasiya və Su Təsərrüfatı” ASC-dən “Ölkə.Az”ın sorğusuna cavab olaraq bildirildi ki, bu problemlər adətən, yaşayış ərazisinə yaxın kanallarda baş verir. Qurumun mətbuat katibi Dilqəm Şərifov belə hallarla bağlı tez-tez açıqlamalar verdiklərini dedi: “Biz bələdiyyə və yerli icra hakimiyyəti orqanlarına səslənirik ki, bu ərazilərdə zibil yeşikləri qoyulsun və yeşiklərin sayı artırılsın. Bu zibillər yığılaraq su təsərrüfatı qurğularını sıradan çıxarır, bəzən isə suyun qarşısı tutulur və kanaldan daşmalar baş verir. Qurumun sahə rəisləri tez-tez nəzarət işləri aparır, həmin kanallar təmizlənir. Lakin həftənin əvvəli təmizlənən kanal həftənin sonu yenidən zibillənmiş olur”.

D. Şərifov qurumun suyun və kanalların çirkləndirilməsinə nəzarət edən idarəsinin məsələyə ciddi yanaşılması üçün aidiyyəti qurumlara məktublar göndərdiyini əlavə etdi: “Bizim missiyamız kanalı təmizləməkdən ibarət deyil. Müəyyən idarələrimiz nəzarəti həyata keçirir, problemlər olan ərazilərlə bağlı komissiya təşkil olunur, yerli icra hakimiyyəti və bələdiyyələrlə birgə məsələnin həllinə çalışırlar. Təəssüfedici hal budur ki, bununla bağlı cərimə tətbiqi yoxdur. Bu cəriməni isə yerli icra hakimiyyəti orqanları həyata keçirməlidir”.

Könül
Ölkə.Az