Bütün dünyanın danışdığı Aylanın ölümü ilə bağlı həbslər

Bütün dünyada müzakirə olunan 3 yaşlı Kobani qaçqını Aylan Kürdi və digərlərinin ölümü ilə bağlı cinayət işi qaldırılıb. 

Türkiyədə 4 nəfər şübhəli şəxs insan qaçaqmalçılığı maddəsi ilə həbs edilib. Adları açıqlanmayan tutulanlar 30-41 yaş arası Suriya vətəndaşlarıdır. 

Böyük Britaniyanın hökumət başçısı Devid Kameron Aylanın ölümü ilə bağlı dərin sarsıntı keçirdiyini və ölkəsinin qaçqınlar qarşısında bütün borclarını yerinə yetirəcəyini açıqlayıb. 

Türkiyə prezidenti Rəccəb Tayyib Ərdoğan isə Qərbi İŞİD-dən qaçan qaçqınlara qarşı laqeyd münasibətdə suçlayır. O, Bodrum sahillərində tapılan cəsədlərin də günahını məhz həmin dövlətlərin üzərinə atır:

“Aralıq dənizində ölən qaçqınlar yox, humanizm idi...” 

Qeyd edək ki, indiyə qədər Türkiyə 2 milyona yaxın qaçqın qəbul etdiyi halda, Avropa ölkələrinin qəbul etdiyi həmin insanların sayı 200.000-i ötmür.

Xatırladaq ki, 3 yaşlı Aylan ailəsi ilə birlikdə (daha 12 nəfər) Suriyadan İŞİD təhlükəsinə görə qaçaraq Türkiyəyə gəlib. Türkiyədən Avropaya getmək isə onlara nəsib olmayıb. Belə ki, qayıq çevrilib və məlum faciə baş verib.  (qafqazinfo)

Ölkə.Az