Azərbaycanda təmassız ödənişlərin sayı 2,3 dəfə artıb

2023-cü il mayın 1-nə dövriyyədə olan ödəniş kartlarının sayı ötən dövrlə müqayisədə 18% artaraq 14,5 milyona çatıb.

"Ölkə.Az" xəbər verir ki, bunu Azərbaycan Mərkəzi Bankının baş direktoru Fərid Osmanov deyib.

O bildirib ki, nağdsız ödənişlərin həcmi isə 2 dəfə artaraq 12,2 milyard manata bərabər olub: "Kart əməliyyatlarında nağdsız əməliyyatların həcmi artmaqdadır. Bu göstəricilər illik əsasda 2-3% artdığı təqdirdə ötən dövrlə müqayisədə bu 11,8% artaraq yekun nəticədə 52%-ə bərabər olub. Bu onu deməyə imkan verir ki, artıq bizim gündəlik ödənişlərimizdə nağdsız ödənişlərin həcmi kifayət qədər artmaqdadır".

"Bu kartların sayında təmassız ödənişlər də xüsusi əhəmiyyət daşıyır. 14 milyon kartdan 10,5 milyonu təmassız ödənişləri dəstəkləyir. Ötən dövrlə müqayisədə təmassız ödənişlərin sayı 2,3 dəfə, həcmi 92% artıb", - deyə F. Osmanov əlavə edib.

Könül
Ölkə.Az