Avtobus kartları kredit verəcək? - AÇIQLAMA

Paytaxt Bakı şəhərində də ictimai nəqliyyatda kart sisteminin tətbiq olunduğunu və ödəmə terminallarının bütün dayanacaqlarda olmadığını nəzərə alsaq, bənzər qərarın ölkəmizdə də tətbiqinə ehtiyac yaranır.

Bəs, bizdə də bu cür addım atıla bilərmi?

Mövzu ilə bağlı Ölkə.Az-a danışan nəqliyyat eksperti Eldəniz Cəfərov belə proqressiv layihənin bir çox ölkələrdə tətbiq olunduğunu bildirib. Onun sözlərinə görə, bu cür addımlar iqtisadiyyata fayda verir:

“Türkiyədə, xüsusən də İstanbulda ictimai nəqliyyat məsələsi dövlətin xüsusi diqqətindədir. İstanbul sakinlərinin və qonaqlarının sərbəst hərəkətini təmin etmək üçün müxtəlif uğurlu layihələr həyata keçirilir. Bu da həmin uğurlu layihələrdən biridir ki, sakinlər və qonaqlar sərbəst hərəkət edə bilsinlər.

Ümumiyyətlə, dünyanın bir çox ölkələrində, bir çox şəhərlərdə əhalinin ictimai nəqliyyatdan istifadənin əlçatanlığı istiqamətində çox işlər görülür. Əgər sakinlər rahatlıqla bir nöqtədən digər nöqtəyə hərəkət edə bilirlərsə, hətta bu şəhər bələdiyyəsinə bir az ziyanlı olsa belə , rentabelli olmasa belə, nəticədə iqtisadiyyata müsbət təsir edir. Çünki vaxtlı-vaxtında mənzil başına çatmayan insanlar iqtisadiyyata daha çox ziyan vururlar”. 

Ekspert ölkəmizdə nəqliyyat sahəsi ilə bağlı mükəmməl qanunvericilik olduğunu desə də, praktiki addımların atılmamasından gileylənib:

“Əfsuslar olsun ki, Azərbaycanda vətəndaşların sərbəst hərəkət etmələri üçün hər hansı tutarlı layihələr həyata keçirilmir. Hər şey sadəcə sözlə deyilir, kağız üzərində qalır. Bu gün Bakı şəhərində belə vətəndaşlar üçün ictimai nəqliyyat əlçatan deyil. Vətəndaşlar Bakıkartın balansını artırmaq üçün məcbur olurlar ki, terminal tapmaq üçün kilometrlərlə yol getsinlər və ya metroya ensinlər.

İnanmıram ki, belə proqressiv layihələri Bakı şəhərində hansısa qurum özündə cəsarət tapıb həyata keçirsin. Yaxın illər ərzində Bakıda ictimai nəqliyyatın normal fəaliyyət göstərəcəyinə əmin deyiləm. Çünki bununla bağlı hər hansı bir məram və istək görmürük. Halbuki bu sahədə Azərbaycanın mükəmməl qanunvericiliyi, iri resurslara malik olan dövlət qurumları, bu işləri görməli olan vəzifəli şəxsləri var. Bütün bunlara baxmayaraq paytaxtımızda ictimai nəqliyyatın vəziyyəti bərbad olaraq qalır.

Təbii ki, belə bir addım olsa, dəstəkləyirik. Çünki bu vətəndaşların ictimai nəqliyyata əlçatanlılığını və marağını artıracaq”.

Billurə Yunus