Yeni qərardan sonra səkilər parkinqə çevilir? - ŞƏRH

Nəqliyyat sahəsi üzrə ekspert Yasin Mustafayev “Ölkə.Az”a açıqlamasında bildirdi ki, parkinqlə bağlı qərar geciksə də, problem həllini tapmağa başlayacaq: 

“Qiymətlərin fərqli olması mövcud parklanmanı nizama salacaq. Çünki şəhərin mərkəzi küçələrində parkinq qiymətlərinin yüksək olması buraya tələbin çox olması ilə bağlıdır. Şəhər kənarına doğru isə qiymətlər nisbətən aşağı enəcək. Müəyyən olunmuş qiymət fərqliliyi dünya təcrübəsinə uyğundur”.

Ekspertin sözlərinə görə, yeni qərarın ardından əlavə parklanma yerlərinin yaranacağı gözlənilir: “Çoxmərtəbəli və birmərtəbəli, yerüstü və yeraltı parklanma yerlərinin yaradılması qaçılmazdır. Bu zaman standartlara uyğun olmayan parkinqlərin təkmilləşdirilməsi də həyata keçiriləcək. Parkinq haqları ödənildikcə və müəyyən büdcə formalaşdıqca infrastrukturun yaradılması, təmassız ödəniş sisteminin qurulması asanlaşacaq”.

Qeyd edək ki, son günlər tez-tez rast gəlinən problemlərdən biri də səkilərin parkinqlərə çevrilməsidir. Belə ki, bəziləri parkinq qaydaları təsdiqləndiqdən sonra bu təşəbbüsün artdığını düşünür.

Y. Mustafayev sözügedən problemə də toxunub və bildirib ki, səkilərin parkinqə çevrilməsi yolverilməzdir: “Səkilər piyadalar üçündür. Piyada səkilərini, velosiped yollarını parkinqə çevirsək, özümüz öz ayağımıza güllə atmış oluruq. Biz səkiləri genişləndirməli, əlavə parkinq yerləri yaratmalıyıq. Birindən alıb digərinə vermək düzgün olmaz”.

Həmçinin ekspert parklama qiymətlərinin təsdiqindən sonra səkilərin zəbt olunaraq parkinqə çevriləcəyini düşünmür: “Buna nəzarət edən qurumlar var və onlar bunu layiqincə həyata keçirməlidirlər. Qanun qəbul edildikdən sonra problemə göz yuma bilməzlər. Əlavə parkinq yerləri isə qanunla müəyyən olunmuş yerlərdə, boş ərazilərdə yaradıla bilər. Belə hallar yarandıqda isə onun qarşısı alınacaq”.

Könül
Ölkə.Az