Mehdiyevlərin bankı böyüyüb
“Ölkə.Az”ın məlumatına görə, sözügedən dövrə bankın cəmi aktivləri 381,214 mln manat təşkil edib. Bu isə ötən ilin eyni dövrü ilə müqayisədə 7,8% çoxdur.
Müştərilərə verilmiş xalis kreditlərin həcmi illik müqayisədə 10% artaraq 262,149 mln manat təşkil edib.
Ötən ilin ikinci rübünün yekunları ilə müqayisədə bankın tələbli depozitlərin həcmi 34% artaraq 15,883 mln manata, müddətli depozitləri isə 3,6% artaraq 132,765 mln manata yüksəlib. Bankın cəmi öhdəlikləri isə 8,6% artaraq cari ilin iyunun 30-na 330,916 mln manat təşkil edib.
“Bank BTB”nin cəmi kapitalı isə illik müqayisədə 1,1% artaraq 50,297 mln manat olub.
2023-cü ilin ilk rübündə bankın xalis faiz gəlirləri 5,305 mln manat, xalis qeyri-faiz xərcləri isə 4,399 mln manat təşkil edib.
Əməliyyat mənfəəti 905 min manat olan bank aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırmalarını 2,252 mln manat azaldıb. Lakin bankın gözlənilməz fəaliyyət növlərindən və əvvəlki dövr üçün uçotdakı dəyişikliklərdən 2,848 mln manat xərci yaranıb və nəticədə, cari ilin ikinci rübünü 309 min manat xalis mənfəətlə başa vurub.
Bu isə cari ilin ilk rübünün xalis mənfəəti ilə müqayisədə 2,9 dəfə azdır.
Xatırladaq ki, “Bank BTB”nin səhmlərinin 74,99%-i Nigar Mehdiyevaya, 19,01%-i Rza Sadiqə (Müşahidə Şurasının sədri), 6%-i isə Tükəzban Mahmudovaya məxsusdur. Mətbuatda Nigar Mehdiyevanın Prezident Administrasiyasının sabiq rəhbəri Ramiz Mehdiyevin gəlini olduğu qeyd olunur.
Könül
Ölkə.Az
