“Biri-birini ləkələyirlər, sonda qatil olur” - Nazilə Səfərli dəstək aldı

O bildirib ki, anaların övladlarını atalarına qarşı düşmən kimi böyütməsi, ən sonda anaların özü üçün ziyanlıdır.

Şairəni dəstəkləyənlərlə yanaşı, onun fikri ilə razılaşmayanlar da olur.

Mövzu ilə bağlı Ölkə.Az-a danışan psixoloq Aytən Ələkbərova deyib ki, bu cür yanaşma təkcə analarda yox, həm də atalarda da var:

“Nazilə xanımın sözündə çox böyük həqiqət var. Bu gün bir-birinin münasibətləri tutmayan təkcə analar yox, atalar da övladında anasına qarşı nifrət aşılayır. Bəzi atalar da ananı övladının gözü qarşısında özünə sərf edəcək dərəcədə ləkələyən addımlar atır. Heç bir halda iki valideyn arasında münasibətlərdəki anlaşmazlıq övladların ana-atalarına nifrət etməsinə səbəb olmamalıdır. Əgər valideynlər aralarında effektiv ünsiyyət qura, psixoloji uyuşmanı yarada bilmirlərsə, bu o demək deyil ki, onlar ataya və yaxud anaya övladı düşmən xislətində böyütsünlər. Çünki bu gün övladında öz doğmasına qaşı düşmən xisləti yaradan valideyn sabah həmin düşmən münasibətin onun özünə qayıtmasının ən böyük səbəbkarlarından biridir.

Bəzən valideynlər düşünür ki, mən neylədim ki, övladım mənə qarşı bu soyuq davranışı etdi və yaxud niyə qəddar oldu? Hər kəs cinayətkar ola bilməz, amma hər kəs qatil ola bilər. Çünki hər bir situasiyanın sonunda münaqişələr yaranır, yaranacaq münaqişələr sabah qətllərə qədər gətirib çıxara bilir. Bunun bünövrəsini də bizə əziz, doğma olan valideynlər qoyur. Münasibətləri tutmayan valideynlərin “anan/atan bizə düşməndir”, “o səni heç istəmədi”, “atan heç düşünmədi ki, sən nə yeyib içirsən”, “mən səni hansı əziyyətlərlə böyütdüm” kimi sözləri övladlarımızı həddindən artıq qəddar və soyuqqanlı edir. Cəmiyyətə qarşı yaranacaq soyuq davranış, qəddarcasına fikirlər, doğmalarına nifrət bəsləməkdən irəli gəldiyindən görün, bu, sabah hansı psixoloji problemlərin yaranmasına gətirib çıxar bilər”. 

Cəmiyyətdə tanınmış şəxslərin bu mövzularda insanlara müraciət etməsini müsbət qiymətləndirən psixoloq hesab edir ki, belə çıxışlar maarifləndirmə yolu ilə insanları pis əməllərdən çəkindirmək üçündür:

“İctimai şəxslər çox zaman gördüklərinə, müşahidələrə əsasən danışır ki, yeni ailələr anlasınlar ki, bir-birini başa düşüb evlənmək lazımdır. Yox, əvvəlcə başa düşüb sonradan anlaşmazlıq yaranıbsa və ailə boşanma həddinə çatıbsa, onda valideynlər bir-birlərini övladlarının gözündən salmasınlar. Düşməncəsinə yanaşmasınlar, çünki sabah atılan daş, atılan təpik insanın özünə qayıdacaq”.

Billurə Yunus