İqtisadçı-ekspert prezidentin gömrük rüsumu ilə bağlı verdiyi fərmanı sadə dillə izah etdi
Azərbaycan Prezidenti İlham Əliyevin oktyabrın 22-də imzaladığı gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında Fərman ölkədə əməlli-başlı ajiotaja səbəb olub.
Xatırladaq ki, prezidentin imzaladığı fərmanda deyilir:
“Fiziki şəxslər tərəfindən Azərbaycan Respublikasının gömrük ərazisinə gətirilən və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10000 ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 2000 ABŞ dolları ekvivalenti məbləğindən) artıq olmayan mallar (aksizli mallar, avtonəqliyyat vasitələri və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalar istisna olmaqla) gömrük ödənişi ödənilmədən gömrük sərhədindən keçirilir”.
Məlum məsələdir ki, dövlət başçısının imzaladığı sənəd rəsmi dildə olmalıdır.
Elə bu baxımdan Gün.Az İqtisadi və Sosial İnkişaf Mərkəzinin sədri, iqtisadçı-ekspert Vüqar Bayramovdan rəsmi dildə olan fərmanı sadə dildə oxuculara izah etməyi xahiş edib.
İqtisadçı qeyd edib ki, Prezidentin fərmanına əsasən, vətəndaşlar 10 min manata qədər olan məhsulları xarici ölkədən alaraq ölkəyə gömrük rüsumu ödəmədən gətirə biləcək.
“Bu vətəndaşların öz ehtiyacları olan məhsulları xarici ölkələrdən daha ucuz qiymətə alıb gətirə bilməsi imkanı deməkdir. Bu pula qənaət etməvə şərait yaratmaqla yanaşı onlara seçim imkanları artacaq.
Məsələn, qonşu Türkiyəyə istirahət edən şəxs vətənə geri dönəndə əvvəllər aldıqları 5 min dollarlıq mala görə rüsum ödəyirdisə, indi heç bir qəpik rüsum ödəmən onu Azərbaycana gətirə biləcək. Bu isə o deməkdir ki, bu vətəndaş “həm ziyarət, həm də ticarət” demək olacaq. Yəni, vətəndaş həm xaricə ölkəyə gedəcək, həm də özünə lazım olan malları alaraq rüsumsuz ölkəyə gətirə biləcəklər”.
Bundan başqa V.Bayramov hesab edir ki, bu fərman ölkədə qiymətlərin ucuzlaşmasına gətirib çıxaracaq.
“Azərbaycanda xarici ölkələrə nisbətdə qiymətlərin baha olması vətəndaşı ölkə xaricinə yönəldəcək. Nəticə etibarı ilə ölkədə yerli qiymətlərin tənzimlənməsinə zərurət yaranacaq və aşağı salınacaq.
Gömrük rüsumundan azad olunacaq malların siyahısı Nazirlər Kabineti tərəfindən hazırlanacaq.
Siyahı açıqlandıqdan sonra hansı məhsulların ölkəyə rüsumsuz gətirilməsinə icazə verildiyi məlum olacaq. Güman edilir ki, daha çox satış üçün olmayan və şəxsi istehlak üçün nəzərdə tutulan əksər məhsullar rüsumdan azad olacaq”.
Onun sözlərinə əsasən, vətəndaşın xarici ölkədən dəyəri 10 min dollardan çox olmamaq şərti ilə müxtəlif istehlak malları alıb ölkəyə gömrük rüsumu ödəmədən gətirə biləcəyini güman etmək olar.
“Bu baxımdan, fərman qiymətlərin tənizmlənməsinə səbəb olduğundan xaricdən mal gətirənlər, eyni zamanda bütövlükdə istehlakçılar son islahatdan yararlana biləcəklər.
Belə ki, rəqabət nəticəsində qiymətlərin aşağı düşməsi bütövlükdə alıcılara imkan verəcək ki, xərclərini azalda bilsinlər. Bu idxal olunan malların qiymətlərində azalma ilə müşahidə edildiyindən istehlakçı üçün ucuz mal az xərcləmə anlamına gələcək.
Bütövlükdə, sözügedən fərman son dövrlər aparılan radikal pozitiv islahatların davamı kimi qiymətləndirilməlidir”.
Ölkə.Az
