Qabil Hüseynli: "Pulsuz efir vaxtının verilməməsi haqqında qərar düzgün olmadı"

Bir həftə sonra Azərbaycanda Parlament seçkiləridir

2015-ci il parlament seçkiləri namizədlərin sayının çoxluğu və pulsuz efir vaxtıın verilməməsi ilə diqqət çəkdi.

Pulsuz efir vaxtının verilməməsi namizədlərin böyük əksəriyyətinin narazılığına səbəb oldu. Təbliğat-təşfiqat dövründə isə partiyalardan yalnız Müsavat mitinq keçirməklə yadda qaldı.

2015-ci il parlament seçkilərinin təbliğat-təşfiqat dövrünü politoloq Qabil Hüseynli Ölkə.Az-a şərh edib.

Təbliğat-təşviqat işinə ümumi baxış

Seçkiqabağı təşviqat üçün lazımi şərait yaradılıb. Hər bir namizədin qeydə alındığı yerlərdə mitinq keçirmək üçün yer verilib. Mitinqlər adam azlığı ucbatından görüş xarakteri daşıyır. Partiyaların nümayəndələri rayonlarda əhali ilə çox rahat görüşlər keçirə bilir, təbliğat-təşviqat edə bilir. Bir sözlə əhalini özlərinə səs verməyə çağırırlar.

Pulsuz efir vaxtının verilməməsi haqqında qərar düzgün olmadı. Bundan əvvəl seçkilərdə iştirak etmişəm. O zaman pulsuz efir vaxtı hər bir namizədə verilirdi. Bu dəfə pulsuz efir vaxtının verilməməsi seçkiqabağı təbliğat-təşviqat kompaniyasına kölgə salır. Bütövlükdə isə əvvəlki illərə nisbətdə daha çox namizədin qeyd alınması, mitinqlərə maneə törədilməməsi yaxşı haldır. Pullu təbliğat üçün şərait var, ancaq pulsuz təbliğata şərait yaradılmaması çatışmazlıq kimi qeyd edilə bilər. Hər şey qalır seçicinin ümidinə. Təbliğat-təşviqat dövründə demək olar ki, demokratik prosedurlara əməl olunur. Bu sarıdan ciddi problemlər meydana çıxmayıb.

Müsavatın mitinqi yoxsa İsa Qəmbərin təbliğat-təşviqatı?

Müsavat partiyası bütün gücünü İsa Qəmbərə sərf edir. Bütün partiya İsa Qəmbərin təbliğat-təşviqat kompaniyasına qoşulub. İsa Qəmbərin namizəd olduğu seçki dairəsində hər addımda müsavatçıya rast gəlmək olar. Məhsul stadionunda keçirilən mitinqdə az adam iştirak etdi. İştirakçılar Müsavat partiyasının rayon təşkilatlarının nümayəndələri idi.

Xətai rayonu 33 saylı dairədə Arif Hacılı üçün mitinq keçirilsə orada da İsa Qəmbər üçün təşkil edilmiş mitinqdəki şəxslər iştirak edəcək. Partiyalar çox zəifdir. Sosial bazaları yoxdur.

Səxavət Məmməd
Ölkə.Az