Keçmiş MTN zabiti: "Azərbaycanda hər kəs dinlənə bilər"

"Praktiki olaraq hər yer, dövlət başçısından tutmuş adi vətəndaşa qədər dinlənə bilər"

MTN ətrafında söz-söhbətlər və qalmaqal ölkə mediasının bir nömrəli gündəm xəbəri olaraq qalır.

Həbslərdə diqqət çəkən məqamlardan biri də, öncə MTN-in Monitorinq Mərkəzinin (telefonların dinlənilməsi idarəsinin) əməkdaşlarının həbs edilməsi oldu. Bir neçə gün bundan öncə isə Rabitə və Yüksək Texnologiyalar Nazirliyinin vəzifəli şəxslərinin də həbs edilməsi beyinlərdə suallar doğurdu.

MTN kimləri və hansı niyyətlə dinləyib?

Bu barədə MTN-nin keçmiş zabiti Sülhəddin Əkbər Ölkə.Az-a danışıb:

"İşdən azad olunanlar eyni zamanda həm də MTN-nin yüksək rütbəli vəzifə sahibləri idilər. Aparılan dırnaqarası əməliyyatlara, qanunsuzluqlara təbii ki, MTN rəhbərliyi rəvac verib. İstintaq müəyyən edəcək ki, hər bir cinayət əməlində kimin səhvi nədən ibarətdir. Görünən odur ki, həbs olunanların içərisində texniki idarənin əməkdaşları əksəriyyət təşkil edir. Bu da onu göstərir ki, qanunsuz əməllərdə, qanunsuz dinləmələrdə texniki idarənin birbaşa iştirakından söhbət gedir.

Praktiki olaraq hər yer, dövlət başçısından adi vətəndaşa qədər dinlənə bilər. Dinləmələr çox məqsəd üçün istifadə ola bilər. Baxır onlar bunu nə üçün dinləyiblər. Şəxsi, qrup, qazanc, əməliyyat, xarici xüsusi xidmət orqanlarına satmaq, şantaj və ya hər hansısa siyasi qərarın qəbuluna təsir etmək məqsədi ilə dinləmələr aparıla bilər. Bunlar hamısı istintaqda müəyyən ediləcək".

Qeyd edək ki, Eldar Mahmudov işdən azad edildikdən sonra MTN-də təmizləmə işləri davam edir.

Səxavət Məmməd
Ölkə.Az