"Qarşılarında məqsəd qoyublar ki, bütün Azərbaycan xalqını pozğuna çevirsinlər"

Qadınlar Xalq artistini haqlı hesab etsələr də, kişilər bu cür yanaşmanı doğru hesab etmirlər.

Mövzu ilə bağlı Ölkə.Az-a danışan sosioloq Elçin Bayramlı isə düşünür ki, vəziyyət əksinədir:

"Bunu on illərdir, deyirəm və faktlarla da sübut edirəm. Elə faktlarla sübut edirəm ki, təkzib etmək mümkün deyil. 

Boşanmalarda sosial faktorların rolu yox dərəcəsindədir. Afaq xanım kimilərinin xeyrinə mən bunu maksimum 10% qiymətləndirə bilərəm. O da ki başdanxarab adamlara aiddir. 90% səbəb mənəvi-psixoloji deqredasiyanın nəticəsidir. Yəni əxlaqsızlığın, boşanmaların təbliğatı, insanların əxlaqi-mənəvi dəyərlərinin dəyişdirilməsinin nəticəsidir. Afaq xanım və onun kimi düşünənlərin fikirləri son dövrlərdə Azərbaycan xalqını faktiki olaraq məhv elədi. Biz boşanmalar üzrə dünyada ön sıralardayıq. Bu, acınacaqlı vəziyyətdir, fəlakətdir, təbliğatların nəticəsidir". 

Sosioloq fikirlərini 3 arqumentlə əsaslandırıb:

"Birincisi, boşananların böyük əksəriyyəti imkanlı şəxslərdir. Əksinə, sosial vəziyyəti çətin olanlar boşanmırlar. 

İkincisi, Azərbaycan xalqının bütün tarixi boyu ən ağır sosial vəziyyətində boşanmalar minimum səviyyədə olub. Amma vəziyyət daha yaxşı olanda boşanmalar çoxalıb. 

Üçüncüsü isə dünyanda məhz boşanmalar üzrə varlı ölkələr ilk sıralardadır. Ən yoxsul ölkələr isə ən axırıncı yerlərdədirlər. Bütün bu faktlar göstərir ki, bu 3 arqumenti dünya dağılsa da, bir nəfər belə, təkzib edə bilməz".

E.Bayramlı hesab edir ki, cəmiyyətdə maddi dəyərləri önə çəkənlərə qarşı ciddi müqavimət olmalıdır:

"Açıq şəkildə deyim ki, bu adamlar xalq düşmənləridir. Xalqa qarşı mənəvi-psixoloji terror həyata keçirirlər. Normalda onlar linç edilməli, cəmiyyətdən təcrid, olunmalıdır. Belə insanlar xalqı məhv edirlər. 

Gəncləri elə formalaşdırırlar ki, həyatlarınızı ancaq maddi dəyərlər üzərində qurun, mənəvi dəyərlərə tüpürün. Və biz bu tüpürməyin nəticəsini 30 ildə gördük. Əxlaqsızlıq, ailə münaqişələri baş alıb getdi. Bu da televiziyaların, serialların, internetdəki biabırçılıqların, şəxslərin bu cür təbliğatlarının rolu nəticəsində olub.

Cəmiyyətin sağlam qüvvələri bu adamları ortadan rədd etməlidir. Belə fikirlər tirajlanmamalıdır. Cəmiyyətdə müqavimət yoxdur deyə, azad şəkildə Azərbaycan xalqına qarşı açıq-mənəvi terror aparılır. Qarşılarında da konkret məqsəd qoyublar ki, bütün Azərbaycan xalqını pozğuna çevirəcəyik. Yəni hamını boşatdıracağıq, ailə institutunu məhv edəcəyik. Bunlar hansısa qüvvələr qarşısında belə bir öhdəlik götürüblər və gecə-gündüz buna çalışırlar. Ortada buna çalışan çox sayda "psixoloq"lar, "ictimai xadim"lər var. Onların gözü ancaq maddiyyatdadır. Maddi dəyərlər üzərində qurulan ailə ola bilməz. Ailə təkcə mənəvi dəyərlər üzərində qurulmalıdır. Bu yoxdursa, ailədən söhbət gedə bilməz. Əgər cəmiyyət hələ ölməyibsə, sağlamdırsa, bu kimi təbliğatlara ciddi şəkildə müqavimət göstərilməli, sərt cavab verilməlidir. Çünki onların fəaliyyətinin nəticəsini biz görürürük.

Gənclərin psixologiyasını dəyişdiriblər. Müasirlik adı altında maddi həzlər, dəyərlər, varlı yaşamaq uğrunda mübarizə xalqı məhvə aparır. Ona görə də bu şəxsləri açıq şəkildə "xalq düşməni" adlandırıram. İstəyirlərsə, getsinlər məni məhkəməyə versinlər", - deyə o əlavə edib.

Billurə