Leyla Əliyeva: Gənclər böyük ruh yüksəkliyi nümayiş etdirir
"Mənim üçün Rusiyada olmaq hər zaman xoşdur”
Bunu Moskvada keçirilən Rusiya Azərbaycanlı Gənclər Birliyinin (RAGB) “RAGB: gənclərin layiqli gələcəyi naminə” mövzusunda VI Forumu çərçivəsində jurnalistlərə açıqlamasında təşkilatın sədri, Heydər Əliyev Fondunun vitse-prezidenti Leyla Əliyeva deyib.
Leyla Əliyevanın sözlərinə görə, Rusiyada çoxlu sayda azərbaycanlı, o cümlədən azərbaycanlı gənc yaşayır: "Bu tədbir bu gəncləri birləşdirmək, onların Rusiya cəmiyyətinə inteqrasiyasına kömək etmək üçün keçirilir".
RAGB-nin sədri forumda təhsil və ekologiya məsələlərinin müzakirə olunacağını söyləyib: "Ekologiya bizim üçün çox vacibdir. Rusiya da bizim ölkəmiz kimi ətraf mühitin qorunmasına xüsusi diqqət ayırır. Bu istiqamətdə Rusiya ilə daha sıx əməkdaşlıq etmək istəyirik. Bundan başqa, Forumda gəncləri maraqlandıran idman, mədəniyyət və digər məsələlərə də toxunulacaq".
Leyla Əliyeva qeyd edib ki, Rusiyada istedadlı azərbaycanlı gənclərin sayı getdikcə artır: "Bu gün RAGB-nin Rusiyanın 70-dən çox regionunda bölmələri fəaliyyət göstərir. Əlbəttə, çox xoşdur ki, gənclərin özü böyük ruh yüksəkliyi nümayiş etdirir".
Forum “AMOR: gənclərin layiqli gələcəyi naminə” adı altında keçirilir.
Forumda Heydər Əliyev Fondunun vitse-prezidenti, AMOR-un sədri Leyla Əliyeva, Azərbaycanın təhsil naziri Mikayıl Cabbarov, gənclər və idman naziri Azad Rəhimov, Azərbaycanın Rusiyadakı səfiri Polad Bülbüloğlu, Rusiya prezidentinin humanitar məsələlər üzrə xüsusi nümayəndəsi Mixail Şvıdkoy, Rusiya Federasiya Şurasının vitse-spikeri İlyas Umaxanov, Dövlət Dumasının deputatı Leonid Slutski və digər şəxslər iştirak edirlər.
Forum çərçivəsində AMOR-un hesabat-seçki konfransı keçiriləcək.
Forumda “Azərbaycan və yeni dövrün çağırışları”, “İDEA - bir bir torpaq, bir gələcək”, “Ədalət səfiri ol”, “Turizmin və diyarşünaslığın inkişafı gənclərin vətənpərvərlik və mənəvi-əxlaqi tərbiyəsinin vasitəsi kimi”, “Gənclər karyera inkişafı: sahibkarlıq və uğura aparan yol” mövzularında bölmələr təşkil olunacaq.
Forum Azərbaycan və Rusiyanın estrada ulduzlarının iştirakı ilə böyük konsert proqramı ilə başa çatacaq.
Ölkə.Az
