Həftənin icmalı
Uorlik Qarabağda silah tətbiq etməkdən imtina etməyə çağırdı
26.10.2015
ATƏT-in Minsk qrupunun amerikalı həmsədri Ceyms Uorlik Qarabağda silah tətbiq etməkdən imtina etməyə çağırıb.
Diplomat bu barədə Twitter şəbəkəsindəki səhifəsində yazıb.
“Ermənistan və Azərbaycan, hücum və ya cavab atəşi açmalarından asılı olmayaraq, silah tətbiqindən imtina etməlidirlər”, - Uorlik bildirib.
Azərbaycan 26 min əcnəbiyə iş verib
26.10.2015
Cari ilin oktyabrın 1-ə olan statistikaya əsasən, bu ilin əvvəli ilə müqayisədə Dövlət Sosial Müdafiə Fondunun (DSMF) un fərdi uçot sistemində qeydiyyata alınan əcnəbilərin sayı 17,65% artıb.
Bu barədə DSMF-dan bildirilib.
“Sentyabr ayı ərzində əlavə olaraq 327 nəfər əcnəbi vətəndaş qeydiyyata alınıb və nəticədə fərdi uçot sistemindəki əcnəbilərin sayı 26 500 nəfərə yüksəlib.
Həmsədrlər “Dağlıq Qarabağ”a səfər etdilər
27.10.2015
"Bu gün ATӘT-in Minsk qrupunun həmsədrləri Dağlıq Qarabağda de-fakto rəhbərliklə görüşəcək".
APA-nın məlumatına görə, bu sözləri qrupun amerikalı həmsədri Ceyms Uorlik "twitter" hesabında yazıb. O, daha sonra həmsədrlərin təmas xəttini keçəcəklərini qeyd edib.
Xatırladaq ki, həmsədrlərin regiona səfəri ötən gün başlayıb. Onlar Ermənistan rəhbərliyi ilə görüşlərdən sonra Azərbaycanın işğal altında olan Dağlıq Qarabağ bölgəsinə gediblər. Həmsədrlərin Bakıya səfəri və Azərbaycan rəhbərliyi ilə görüşləri sabaha planlaşdırılır.
İlqar Məmmədovun döyülməsi xəbəri yalan çıxdı
27.10.2015
Ədliyyə Nazirliyinin Penitensiar xidməti REAL hərəkatının həbsdə olan sədri İlqar Məmmədovun saxlanıldığı cəzaçəkmə müəssisəsində döyülməsi ilə bağlı yayılan xəbərlərə yenidən aydınlıq gətirib.
Ölkə.Az xəbər verir ki, Penitensiar Xidmətin İctimaiyyətlə əlaqələr şöbəsinin rəisi Yaşar İsakov AzVision.az-ın sorğusuna cavab olaraq bildirib ki, təqsirləndirilən şəxslərin və ya məhkumların saxlanma şəraiti, eləcə də cəzanı icra edən orqanın hər hansı əməkdaşının onlara qarşı qanunsuz əməlləri və zorakılıq hərəkətləri ilə bağlı Ədliyyə Nazirliyinə, Penitensiar xidmətə və digər aidiyyatı orqanlara şikayət veriləməlidir.
MSK: Təşviqat zamanı pozuntular qeydə alınmayıb
27.10.2015
Milli Məclisə noyabrın 1-ə təyin edilmiş seçkilərlə əlaqədar seçkiqabağı təşviqat zamanı hər hansı nəzərəçarpacaq pozuntular və ya hallar qeydə alınmayıb.
Mərkəzi Seçki Komissiyasının Mətbuat xidmətindən verilən məlumata görə, yerlərdə müəyyən xırda nöqsanlar baş versə də, müvafiq dairə seçki komissiyaları tərəfindən dərhal reaksiya verilərək həmin məsələlər aradan qaldırılıb.
ETSN: Azərbaycanda qanunsuz ov edən Suriya və İraq vətəndaşları saxlanılıb
27.10.2015
Bu il oktyabrın 21-də Mahmudçala Ovçuluq Təsərrüfatının ərazisində Ekologiya və Təbii Sərvətlər Nazirliyinin (ETSN) əməkdaşları tərəfindən keçirilən reyd zamanı qanunsuz ov edən xarici ölkə vətəndaşları saxlanılıb.
ETSN-nin mətbuat xidmətindən APA-ya verilən xəbərə görə, araşdırma zamanı qanun pozucularının Suriya vətəndaşı Al Hamdo Məhəmməd və İraq vətəndaşı Xəlil İbrahim Eesee Əl-Cavari olduğu müəyyən edilərək onlardan 4 ədəd çöl göyərçini, 4 ədəd bildirçin, 2 ədəd ev göyərçini, qızılquş tutmaq üçün 4 ədəd cələ, 1 ədəd tor və quş saxlamaq üçün səbət aşkarlanıb.
Azərbaycanda uşaqlara tarixi adların qoyulması halları artır
27.10.2015
Azərbaycanda son dövrlərdə uşaqlara daha çox tarixi adlar qoyulur.
Bunu Nazirlər Kabineti yanında Terminologiya Komissiyasının sədr müavini Sayalı Sadıqova deyib.
Onun sözlərinə görə, son dövrlərdə uşaqlara daha çox qədim Orxan, Yenisey abidələrində, “Dədə-Qorqud”da, Mahmud Kaşğarlının divanında verilən adlardan istifadə edilir: “Məsələn, bizə “Albas” adının qoyulması üçün müraciət etmişdilər. Türk mənşəli olan bu ad Qıpçaq hökmdarının adıdır, daha çox mübarizlik, qəhrəmanlıq mənasını ifadə edir. Son dövrdə bizə“Alpər”, “Beyrək” adının qoyulması üçün də müraciət edirlər. Belə adların yenidən qayıtması bizim milliliyimizi, kimliyimizi əks etdirir”.
S.Sadıqova deyib ki, yenidoğulan uşaqlara mürəkkəb adlar deyil, artıq sadə, lakonik adlar qoyulur.
Komissiya rəsmisinin sözlərinə görə, son 5 ildə Azərbaycanda valideynlərin övladlarına gülüş doğuran adlar qoyması faktları azalıb.
Azərbaycan dilinə 2500 yeni termin daxil edilir
27.10.2015
Azərbaycan dilinə rəsmi olaraq 2500 yeni termin daxil edilir.
Nazirlər Kabineti yanında Terminologiya Komissiyasının sədr müavini Sayalı Sadıqova Trend-ə bildirib ki, həmin terminlər yeni hazırlanan və artıq çap olunma ərəfəsində olan izahlı dilçilik lüğətinə daxil edilib.
Lüğətdəki terminlər son 2-3 il ərzində dilimizə yeni daxil olan və dilin daxili imkanları hesabına yaranan sözlərdir. Terminlər müxtəlif sahələr - informatika, iqtisadiyyat, riyaziyyat, kimya, tibb sahələri üzrədir. Yeni terminlərin sırasında informatika sahəsi üzrə olan sözlər çoxluq təşkil edir.
S.Sadıqova əlavə edib ki, yeni terminlər indiyədək Azərbaycan dilinin orfoqrafiya, eləcə də izahlı lüğətinə daxil edilməyib.
Banka borcu olan hakim bankla bağlı işə baxmayacaq
27.10.2015
Bu gün Yasamal Rayon Məhkəməsində “Nikoil Bank”ın vəkil Əkrəm Həsənov və aznews.az xəbər saytına qarşı qaldırdığı iddia üzrə məhkəmə iclası keçirilib.
Ölkə.Az “Report”-a istinadən xəbər verir ki, iclasda məhkəmənin sədri Ələddin Cəfərovun qəbul etdiyi qərardad elan olunub.
Məlum olub ki, məhkəmə sədri vəkil Əkrəm Həsənovun hakim Zəfər Quliyevlə bağlı etirazını təmin edib, yəni Z.Quliyev bu işdən kənarlaşdırılıb. İş baxılması üçün məhkəmənin digər hakiminə - Sərdar Mehrəliyevə verilib.
Hakim Sərdar Mehrəliyev məhkəmənin növbəti iclasını noyabrın 13-nə təyin edib.
Bu gün metro faciəsinin ildönümüdür
28.10.2015
Bu gün Bakı Metropoliteninin “Ulduz” və “Nəriman Nərimanov” stansiyaları arasında baş vermiş qəzadan 20 il ötür. 1995-ci ilin oktyabrın 28-də baş vermiş qəzada 300-ə yaxın adam ölmüş, 400 nəfər isə yaralanmışdı.
Hadisədən sonra araşdırılmalar aparıldı və hadisənin baş verməsinə səbəb kimi “Ulduz” və “Nəriman Nərimanov” stansiyaları arasındakı tuneldə qatarın mühərriklərindən birində yanğın baş verməsi göstərildi. Maşinist qatarı tuneldə saxlayıb, insanlar isə təşviş içində vaqonlardan çıxıb qaçmağa başlayıblar. Havaçəkmə sistemi pis olduğundan tuneldəkilər hava çatışmazlığından və ayaq altında qalaraq ölüblər.
Aparılan araşdırma nəticəsində maşinistin qatarı tuneldə saxlamaq qərarı səhv sayılmışdı.
Bu qəza “Ginnesin rekordlar kitabı” redaksiyasını ən dəhşətli metro qəzaları siyahısına yenidən baxmağa vadar etdi və “birincilik” Azərbaycana keçdi.
Azərbaycanda daha 827 dərman vasitəsinin qiyməti azaldıldı
28.10.2015
Bu gün Tarif (qiymət) Şurasının növbəti iclası keçirilib.
Şuradan verilən məlumata görə, Azərbaycan Respublikasının Prezidenti cənab İlham Əliyevin tapşırığına uyğun olaraq, dərman vasitələrinin qiymətlərinin tənzimlənməsi prosesi davam etdirilir. Tarif (qiymət) Şurasının 2015-ci il 28 oktyabr tarixində keçirilmiş növbəti iclasında daha 827 dərman vasitəsinin qiyməti təsdiqlənib. Ümumilikdə, indiyədək Şura tərəfindən 3010 dərman vasitəsinin qiyməti tənzimlənib ki, bunlardan 1151 dərman vasitəsi təsdiq edilmiş qiymətlərlə artıq satışdadır. Qiymətləri təsdiqlənmiş digər 1110 dərman vasitəsinin qiyməti 1 dekabr tarixindən, 749 dərman vasitəsinin qiyməti isə 21 dekabr tarixindən qüvvəyə minəcək.
Azərbaycanın turizm sahəsində daha bir yenilik
28.10.2015
Azərbaycanda turizm sahəsində elektron marketinq üzrə işçi qrupu yaradılıb.
Mədəniyyət və Turizm Nazirliyindən Trend-ə daxil olan məlumata görə, Azərbaycanın turizm potensialının elektron marketinq vasitələri ilə təbliği məqsədilə nazirlikdə turizm sahəsində elektron marketinq üzrə işçi qrupu yaradılıb.
Yaradılan işçi qrupu nazirliyin marketinq planına əsasən hədəf bazarlarında aidiyyəti kampaniyaların təşkilində, xarici internet portallarında ölkəmizin turizm potensialının təbliğ olunması üçün müvafiq layihələrin həyata keçirilməsində, eləcə də gəlmə turizm üzrə marketinq tədqiqatlarının aparılmasında iştirak edəcək.
Zəngilansız 22 il
29.10.2015
Oktyabrın 29-da Azərbaycan Respublikasının Zəngilan rayonunun Ermənistan silahlı qüvvələri tərəfindən işğal edilməsindən 22 il ötür.
1988-ci ildən 1993-cü ilin noyabrınadək düşmənə baş əyməyən, yağı hücumlarına sinə gərən, yüzlərlə şəhid verən Zəngilan işğala məruz qalan ən sonuncu rayon olub.
Qubadlı və Cəbrayıl rayonlarının işğalı nəticəsində mühasirəyə düşən Zəngilan əhalisi çıxış yolunu Araz çayından İran ərazisinə keçməkdə görüb. Əks təqdirdə ikinci bir Xocalı hadisəsinin baş verməsi qaçılmaz olacaqdı.
Zəngilan Birinci Qarabağ müharibəsində 188 şəhid verib, bu günədək rayonun 44 sakini itkin düşmüş sayılır.
Bakı-Culfa-Naxçıvan dəmiryolunun üzərində yerləşən bu rayon mühüm strateji əhəmiyyətə malikdir.
Ərazisi 707 kvadratkilometr, əhalisi isə 35 mindən çox olub. Rayonun iqtisadiyyatının əsasını kənd təsərrüfatı - üzümçülük, tütünçülük və heyvandarlıq təşkil edib.
MTN-də yeni təyinat
29.10.2015
Azərbaycan Milli Təhlükəsizlik Nazirliyində yeni təyinat olub
Ölkə.Az Lent.az-a istinadən xəbər verir ki, Azərbaycan milli təhlükəsizlik nazirinin birinci müavini, general-leytenant Mədət Quliyevin əmri ilə nazirliyin Hərbi Əks-kəşfiyyat Baş İdarəsinin rəisi vəzifəsi general-mayor Hafiz Musayevə həvalə olunub. H.Musayev bu təyinata qədər həmin idarənin rəis müavini olub.
Xatırladaq ki, adıçəkilən idarənin rəisi Nizami Şirinov ötən gün M.Quliyevin əmri ilə tutduğu vəzifədən azad olunmuşdu.
Vidadi Zeynalov həbs olundu
29.10.2015
Rabitə və Yüksək Texnologiyalar Nazirliyinin (RYTN) aparat rəhbəri Vidadi Zeynalov həbs olunub.
Ölkə.Az-ın APA-ya istinadən verdiyi xəbərə görə, Səbail Rayon Məhkəməsinin qərarı ilə V. Zeynalov barəsində 3 ay müddətinə həbs qətimkan tədbiri seçilib.
V. Zeynalovun vəzifəsindən azad olunması barədə də artıq əmr imzalanıb.
Qeyd edək ki, V. Zeynalovun həbsinin sabiq milli təhlükəsizlik naziri Eldar Mahmudovun yaxın qohumu, Bakı Telefon Rabitəsi İstehsalat Birliyinin rəhbəri Beytulla Hüseynovun fəaliyyəti ilə əlaqəli olduğu bildirilir.
Məşhur aparıcı NİİM-dən reportaj hazırladı
29.10.2015
Tanınmış radio aparıcısı, bloger Tural Yusifov Nəqliyyat Nazirliyi Nəqliyyatı İntellektual İdarəetmə Mərkəzindən reportaj hazırlayıb.
Ölkə.Az xəbər verir ki, reportajda aparıcı NİİM-in fəaliyyəti haqqında danışıb.
Aparıcı Bakıda yol hərəkətinin necə təşkil olunması, mərkəzin yaranmasından sonra yollarda hansı dəyişikliklərin olması və Nəqliyyatı İntellektual İdarəetmə Mərkəzindən asılı olan bir sıra məqamlara toxunub.
NİİM-dən aparıcıya Bakı şəhərində yol hərəkətinin necə təşkil olunması, sıxlıq müşahidə olunan zaman mərkəz tərəfindən hansı addımların atılması barədə məlumat verilib.
Azərbaycanda uşaqlara bu adların qoyulmasının qarşısı alınıb
29.10.2015
“Son 1 ayda “ASAN Xidmət” mərkəzlərindən uşaqlara qoyulan, gülüş doğuran adlarla bağlı bizə 20-ə yaxın müraciət daxil olub”
Bunu APA-ya açıqlamasında Nazirlər Kabineti yanında Terminologiya Komissiyasının sədr müavini Sayalı Sadıqova deyib.
O bildirib ki, “ASAN Xidmət” mərkəzlərindən daxil olan müraciətlər zamanı valideynlərin yeni doğulan körpələrinə “İngilis”, “Frunze”, “Nyuton”, “Qaliley” adları qoymaq istədikləri məlum olub: “Tərəfimizdən bu adlara qəti qadağa qoyuldu.”
S. Sadıqova əlavə edib ki, son vaxtlar dilimizə yad olan, əsasən alınma olan 200-ə yaxın ad ləğv olunub.
Sədr müavini qeyd edib ki, adlarla bağlı ayrıca lüğətin hazırlanmasına ehtiyac var: “Adlar lüğətinin olması çox yaxşı olardı, qeydiyyat şöbələrinin də işi asanlaşardı”.
Son 25 il ərzində vərəmdən ölüm halları iki dəfə azalıb
29.10.2015
Vərəmə yoluxma nəticəsində ölüm halları 1990-cı ildən təxminən iki dəfə azalıb. Buna baxmayaraq, hələ də bu təhlükəli xəstəlik hər gün 4 min 400 nəfərin həyatına son qoyur.
Bu barədə Dünya Səhiyyə Təşkilatının (DST) hesabat məruzəsində bildirilir.
"Hesabat göstərir ki, vərəmlə mübarizə üzrə həyata keçirilən tədbirlər uğurlu nəticələrə gətirib",-deyə DST-nin Baş direktoru Marqaret Çan bildirib.Onun sözlərinə görə, nailiyyətlər çox təsirlidir, amma bu epidemiyanın kökünü kəsmək üçün tədqiqatlara sərmayə qoyuluşunu artırmaq lazımdır.
Azərbaycanlıya Avropa qitəsinin ən yaxşı idmançısı adı verildi
30.10.2015
2012-ci il London Yay Olimpiya oyunlarının qalibi sərbəst güləşçi Toğrul Əsgərov ABŞ-ın Vaşinqton şəhərində keçirilən Milli Olimpiya Komitələrinin Assosiyasiyasının 20-ci Baş Assambleyasında mükafatlandırılıb.
Gənclər və İdman Nazirliyinin mətbuat xidmətindən Ölkə.Az-a verilən xəbərə görə, sərbəst güləşçimiz 20-ci Milli Olimpiya Komitələrinin Assosiasiyasının Baş Assambleyasında Avropa qitəsi üzrə ən yaxşı kişi atleti adına layiq görülüb.
Qeyd edək ki, 26 oktyabr tarixindən öz işinə başlayan Assambleyada Azərbaycan Respublikası Gənclər və İdman Naziri Azad Rəhimov, Azərbaycan Respublikası Milli Olimpiya Komitəsinin (MOK) vitse-prezidenti Çingiz Hüseynzadə, MOK-nin Beynəlxalq Əlaqələr İdarəsinin rəisi Könül Nurullayeva iştirak edirlər.
MTN-ə yeni səlahiyyət verildi
30.10.2015
Azərbaycana səfər etmək istəyən əcnəbilərdən Miqrasiya Məcəlləsi ilə nəzərdə tutulmayan sənədlərin tələb olunması qadağandır
Ölkə.Az xəbər verir ki, APA-nın məlumatına görə, bu reqlamentə əsasən “//evisa.mfa.gov.az” ünvanında təqdim edilən elektron xidmət Azərbaycana səfər etmək istəyən əcnəbilərin və vətəndaşlığı olmayan şəxslərin viza (turistlərə verilən elektron viza istisna olmaqla) almaq üçün elektron qaydada müraciətinin və sənədlərinin qəbul edilməsi, baxılması, cavablandırılması və baxılmanın nəticəsindən asılı olaraq viza rəsmiləşdirilməsi və ya viza rəsmiləşdirilməsindən imtina edilməsini əhatə edir.
Mehriban Əliyeva rusiyalı qadınlar üçün nümunədir
30.10.2015
Rusiya Federal Məclisinin Federasiya Şurasının üzvü, Rusiya Qadınlar İttifaqının sədri Yekaterina Laxova qeyd edir ki, Azərbaycanda hətta parlament seçkiləri ərəfəsində yüksək sabitlik qorunur.
Trend-in məlumatına görə, Y.Laxova “Moskva-Bakı” portalına deyib ki, ölkədə tam sakitçilikdir: "Əgər sakitçilik olmasaydı, hamı dərhal bu barədə danışardı".
Senator Azərbaycanın Prezidenti İlham Əliyev və birinci xanımı Mehriban Əliyevaya böyük hörmət və ehtiramla yanaşdığını bildirib: “Bilirəm ki, Mehriban xanım xeyriyyəçilik, qadın hərəkatının inkişafı, eyni zamanda ailə və uşaqları ilə çox məşğul olur".
Y.Laxova qeyd edib ki, Mehriban Əliyeva bir çoxları üçün nümunədir.
İndoneziya Azərbaycanla vizasız rejim tətbiq edir
30.10.2015
Cari ilin noyabrın 1-dən Azərbaycan vətəndaşları İndoneziyaya vizasız səfər edə biləcəklər.
Bunu İndoneziyanın Bakıdakı səfirliyindən deyiblər.
Turizm məqsədilə İndoneziyaya səfər edən Azərbaycan vətəndaşları ölkədə 1 ay ərzində vizasız qala biləcəklər. Vizasız rejim yalnız turistlərə şamil ediləcək.
Vizasız rejimin tətbiqi barədə qərar iki ölkə arasında turizm sahəsində əlaqələrin genişləndirilməsi, Azərbaycandan turizm axınının artımı üçün qəbul edilib.
Naxçıvanda torpaqların elektron qeydiyyata alınmasına başlanıldı
31.10.2015
Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsi torpaqların yenidən ölçülərək elektron uçota alınmasına başlayıb.
"Report"un məlumatına görə, bu işlərin yerinə yetirilməsi üçün Muxtar Respublikanın Daşınmaz Əmlak və Torpaq Məsələləri üzrə Dövlət Komitəsinin iş planına uyğun olaraq, mütəxəssislərdən ibarət işçi qrupları yaradılıb.
Görülən işin keyfiyyətlə yerinə yetirilməsi üçün işçi qrupları yüksək texniki göstəricilərə malik, müasirtipli GPS və elektron taxometrlərlə təmin olunublar.
Milli Qəhrəman Koroğlu Rəhimovun doğum günüdür
31.10.2015
Bakının küçələrindən biri onun adını daşıyır.
Bu gün Azərbaycanın Milli Qəhrəmanı Koroğlu Rəhimovun doğum günüdür.
Koroğlu İsmayıl oğlu Rəhimov 1953-cü il oktyabrın 31-də Oğuz rayonu Xaçmaz kəndində anadan olub.
1961-ci ildə ailəsi ilə birlikdə Qərbi Azərbaycanın Zəngibasar mahalı Sarıcalar kəndinə köçüb, sonradan Bakıya qayıdıb işləməyə başlayıb.
1992-ci il martın 17-də Koroğlu Rəhimov könüllü olaraq Azərbaycan Milli Ordusu sıralarına yazılır. 1992-ci il aprelin 30-da Koroğlu Rəhimov “N” saylı hərbi hissədə 2-ci motoatıcı bölüyün komandiri təyin edilir.
Goranboy rayonunun Buzlaq, Çantaz, Erkəc kəndlərinin azad olunmasında onun başçılıq etdiyi bölük əsil qəhrəmanlıq göstərir. Daha sonra Başkənd, Madagiz, Gülüstan kəndlərinin düşməndən azad edilməsində iştirak edir.
1992-ci ilin iyulun 3-də Koroğlunun komandir olduğu bölük Ağdərə istiqamətində hücuma keçir. Bu, Koroğlunun son döyüşü olur. O, Ağdərə yaxınlığında gedən döyüşdə həlak olur.
DİN sahibkarlar üçün yeni "Qaynar xətt" yaratdı
31.10.2015
Sahibkarlıq fəaliyyətinə mane olma halları barədə Daxili İşlər Nazirliyin (DİN) 1002 nömrəli "Qaynar xətt"inə məlumat vermək olar.
DİN-in mətbuat xidmətindən verilən məlumata görə, Azərbaycan Daxili İşlər Nazirliyi tərəfindən "Sahibkarlıq sahəsində aparılan yoxlamaların dayandırılması haqqında" Azərbaycan Respublikasının 2015-ci il 20 oktyabr tarixli Qanunu, onun tətbiqi və sahibkarlıq sahəsində dövlət tənzimlənməsinə dair əlavə tədbirlər barədə dövlət başçısının 2015-ci il 26 oktyabr tarixli fərmanı rəhbər tutularaq həmin normativ hüquqi aktlardan irəli gələn tələblərin icrası, o cümlədən aidiyyəti üzrə daxil olan müvafiq məlumatların araşdırılması və zəruri tədbirlərin görülməsi davam etdirilir.
Ölkə.az
