Rusiyada azərbaycanlı iş adamının həbs müddəti uzadıldı

Kazanın Sovetski rayon məhkəməsi “Admiral” ticarət mərkəzində baş verən yanğında ittiham edilən “Zarya” MMC-nin (binanın icraçı-şirkəti) direktor müavini Gülhüseyn Nəcəfovun nəzarət altında saxlanılmasının müddətini 14 gün də artırıb, bu barədə RİA Novosti-yə hakimin köməkçisi bildirib.

Bu ilin mart ayının 11-də Kazanın ən iri ticarət mərkəzlərindən biri olan “Admiral”da yaranan və tez bir zaman ərzində 4 min kvadrat metr ərazidə yayılan yanğın hadisəsi baş vermişdi. Fövqəladə hadisə nəticəsində 17 nəfər həlak olub, 70 nəfər xəsarət alıb. İki nəfərin taleyi isə məlum deyil.

Nəcəfovun həbs müddəti noyabrın 11-də başa çatırdı. İclas müttəhimin iştirakı olmadan keçirilirdi, o, hal-hazırda xəstəxanadadır. Vəkilin və qohumların sözlərinə görə, Nəcəfov özünü pis hiss edir və ixtisaslaşdırılmış kardioloji və nevroloji yardıma ehtiyacı var, bu yardımı isə məhkumlar üçün nəzərdə tutulmuş xəstəxana şəraitində ala bilməz.

“Məhkəmə istintaqın iddiasını qismən təmin edib, Nəcəfovun nəzarət altında saxlanılması müddəti 14 gün artırılıb”, - agentliyin həmsöhbəti bildirib.

Onun sözlərinə görə, iki həftə ərzində Nəcəfov müayinə keçməlidir, nəticədə məhkəməyə onun nəzarət altında saxlanılmasının mümkün olub-olmamasına dair tibbi çıxarış təqdim edilməlidir.

Daha öncə “Zarya” MMC-nin direktoru Hüseyn Qəhrəmanovun, onun müavini Nikolay Kayekinin, fəhlə Firdinat Uldanovun nəzarət altında saxlanılma müddəti 2016-cı ilin fevral ayının 11-nə qədər uzadılıb. Eləcə də iş üzrə barələrində ev dustaqlığı qərarı çıxarılan şəxslərin müddəti artırılıb.

Hal-hazırda 14 nəfər “Admiral”da baş vermiş yanğınla əlaqədar iş üzrə cinayət məsuliyyətinə cəlb edilib. Bu, “Zarya” MMC-nin direktoru və iki direktor müavini, “AS Menecment” (TM binasının sahib-şirkət) direktorlar heyətinin sədri və baş direktoru, Dövlət inşaat nəzarətinin iki mütəxəssisi, rayonlararası məhkəmə pristavları şöbəsinin rəisi, sabiq icraçı-pristav və beş nəfər fəhlədir.oxu.az

Ölkə.Az