Fəxrəddin Həsənzadə: Ölkə başçısının bu qərarı gənclərin təhsilə marağını stimullaşdıracaq

“Doktorantlara, ali təhsil, orta ixtisas və ilk peşə-ixtisas təhsili müəssisələrinin tələbələrinə və şagirdlərinə verilən təqaüdlərin artırılması haqqında” Azərbaycan Respublikası Prezidentinin Sərəncamı ilə bağlı fikirlərini bölüşən Gənclər üçün Təhsil Mərkəzinin icraçı direktoru Fəxrəddin Həsənzadə: Məhz bu qərar ödənişli əsaslarla tələbə adını qazanan əhalinin aztəminatlı təbəqələri üçün keyfıyyətli təhsilin əlçatanlığı, onların sosial durumunun təminatı, həmçinin təhsildə rəqabətlilik mühitinin yaradılmasına yönəlik bir vasitədir.

Sözügedən qərar özlüyündə bir daha göstərdi ki, Azərbaycanda bütün istiqamətlərdə olduğu kimi,təhsil istiqamətində də atılan addımlar dayanıqlı və davamlı inkişafa hesablanır. Belə ki, bu sərəncam hələ 2 il öncə ölkə başçısı cənab İlham Əliyev tərəfindən qəbul edilən “Azərbaycan Respublikasında təhsilin inkişafı üzrə Dövlət Strategiyası”nda təhsilalanların nailiyyətlərinin qiymətləndirilməsi üzrə yeni sistemlərin qurulmasını, təhsilalanların istedadının aşkar olunmasını özündə ifadə edən ikinci strateji istiqamətin məntiqi davamıdır. Bu isə birbaşa olaraq təhsilalanın qazandığı bilik və bacarıqların iqtisadi amilə çevrilməsidir.

Dövlət sifarişli və ödənişli əsaslarla təhsil alan tələbələrin yüksək imtahan nəticələrinə uyğun olaraq, təqaüd alma imkanı onların təkcə imtahan ərəfəsində deyil, həmçinin tədris müddətində dərslərinə daha məsuliyyətli yanaşmalarına, gənclərin təhsilə marağının stimullaşdılmasına şərait yaradacaq. Tam əminliklə qeyd edə bilərik ki, təhsil sahəsində aparılan bu islahatlar gənclərin səmərəli əmək fəaliyyətinə hazırlanmasına, rəqabət qabiliyyətli kadrlar formalaşdırılmasına və müasir həyatda ölkənin dayaq nöqtəsi olan müasir təfəkkürlu gənclərin inkişafına hesablanmışdır.

Ölkə.Az