Uzun müddət oturmaq beynin kiçilməsinə səbəb olur
Ölkə.az xəbər verir ki, Vanderbilt Universiteti, Pittsburgh Universiteti və Seul Milli Universitetindən olan alimlərin həyata keçirdiyi tədqiqatda 50 yaş və yuxarı şəxslərin oturma müddətləri ilə beyin sağlamlığı arasındakı əlaqə araşdırılıb.
Alimlər qeyd edirlər ki, hərəkətsiz həyat tərzi, xüsusilə alzheimer olmaqla demensiyanın müxtəlif formaları ilə əlaqələndirilə bilər. Mütəxəssislər yalnız idman etməyin kifayət etmədiyini, oturaq keçən vaxtın da azaldılmasının vacib olduğunu bildirirlər.
Araşdırma çərçivəsində yaşı 50-dən yuxarı olan 404 könüllü iştirakçı bir həftə ərzində üzərlərində yerləşdirilən sensorlarla izlənilib. İştirakçıların 87%-i həftəlik minimum tövsiyə edilən idman müddəti olan 150 dəqiqəni yerinə yetirsə də, gündə daha uzun müddət oturan şəxslərdə beyin həcmində kiçilmə və zehni geriləmə əlamətləri müşahidə olunub. Xüsusilə yaddaşla əlaqəli olan hipokampus bölgəsində incəlmə qeydə alınıb. Qeyd edək ki, bu bölgə alzheimer xəstəliyində ilk zərər görən beyin sahələrindən biridir.
Araşdırma, oturma müddəti ilə beyin sağlamlığı arasında birbaşa səbəb-nəticə əlaqəsi qurmasa da, artan hərəkətsizliklə birlikdə beyində qocalma prosesinin daha sürətli getdiyini göstərib. Genetik olaraq Alzheimer riskinə meyilli olan şəxslərdə isə bu əlaqənin daha da güclü olduğu aşkarlanıb.
Mütəxəssislər bildirirlər ki, gün ərzində uzun müddət masa arxasında oturan və ya ümumiyyətlə azhərəkətli həyat tərzi keçirən insanlar oturma müddətini azaltmağa yönəlik addımlar atmalıdırlar.
Həmidə İbrahimova
