Kondisioner sizi sərinlədir, yoxsa xəstələndirir?

Ölkə.az xəbər verir ki, kondisioner havası insan orqanizminə bir neçə şəkildə mənfi təsir göstərə bilər:

Kəskin temperatur fərqi:
Xarici hava ilə kondisioner havası arasındakı kəskin fərq bədəni stressə salır. Bu da immun sisteminin zəifləməsinə və soyuqdəyməyə səbəb olur.

Havanın quruluğu:
Kondisionerlər havanı qurutduğundan boğaz, burun və gözlərdə quruluq və yanma hissi yarada bilər. Bu vəziyyət virus və bakteriyaların selikli qişalarda daha asan yayılmasına şərait yaradır.

Filtrlərin çirklənməsi:
Uzun müddət təmizlənməyən kondisioner filtrlərində mikroblar, göbələklər və allergenlər toplanır. Bu da bronxit, allergik astma, sinusit kimi xəstəliklərə yol aça bilər.

Daimi sərin hava axını:
Uzun müddət kondisioner qarşısında oturmaq əzələ və boyun tutulmaları, xüsusilə bel və kürək ağrıları ilə nəticələnə bilər.

Terapetlər və pulmonoloqlar bildirirlər ki, kondisionerlə otaq arasındakı temperatur fərqi 6-8 dərəcəni keçməməlidir, otaq hərarəti 22-25°C arasında saxlanmalıdır. Kondisioner filtrini ayda bir dəfə təmizləmək və ya dəyişmək vacibdir. Birbaşa hava axınına məruz qalmamaq üçün cihazın istiqamətini insanlara yönəltmək olmaz. Qapalı məkanda uzun müddət qalındıqda otaq vaxtaşırı havalandırılmalıdır.

Həmidə İbrahimova