Yeniyetmələrin yuxu problemlərinin aradan qaldırılması zəruridir - ARAŞDIRMA
Erkən yeniyetməlik dövründə, məsələn, 14 yaşında baş verən yuxu problemləri gələcəkdə, misal üçün, 17 yaşında özünə zərərvermə riski yarada bilər. Bu, Böyük Britaniyanın Vorvik və Birminhem universitetlərində çalışan alimlərin 10 min yeniyetmə üzərində apardıqları araşdırma zamanı məlum olub.
Ölkə.Az “MedicalXpress” portalına istinadla xəbər verir ki, araşdırmanın nəticəsinə görə, az yatmaq, yuxuya gec getmək və tez-tez oyanmaq yeniyetmələrin özlərinə zərər yetirmək düşüncəsi ilə əlaqəli ola bilər. Yuxu problemləri hətta yaş, cins, sosial-iqtisadi vəziyyət və depressiya kimi digər amillər nəzərə alındıqdan sonra da risk faktoru olaraq qalır. Alimlər bildirirlər ki, yuxu rejimi dəyişdirilə bilər. Məktəblərdə və ailələrdə düzgün müdaxilə etməklə və məsləhətlər verməklə yeniyetmələrin yuxu ilə bağlı risklərini azaltmaq mümkündür.
Mütəxəssislər deyirlər ki, yeniyetmələrin yuxu sağlamlığını qorumaq onların gələcəkdə özlərinə zərər yetirmək düşüncəsinin qarşısını almaqda mühüm rol oynaya bilər.//Azərtac
