Dövlət subsidiyaları meyvə ixracının artımına təsir göstərir
Bu barədə Ölkə.Az-a Kənd Təsərrüfatı Nazirliyindən bildirilib.
Məlumata əsasən, Aqrar Subsidiya Şurası 2019-cu ildən yeni salınmış intensiv bağların hər hektarına görə fermerlərə yüksək əmsallı subsidiyalar ayırır. Sonrakı illərdə əkin subsidiyası ilə yanaşı birdəfəlik subsidiyalar da tətbiq edilib. Məqsəd yeni intensiv və superintensiv bağların salınmasını stimullaşdırmaq, su və torpaq resurslarından səmərəli istifadəni təmin etmək, həmçinin xarici bazarlara meyvə ixracını artırmaqdır.
2020–2024-cü illərdə meyvə bağlarının salınmasına ümumilikdə 171,3 min manat subsidiya ayrılıb. Həmin dövrdə ölkədən 2,22 milyard manatlıq meyvə ixrac edilib. Müasir intensiv bağlar 2-ci ildən məhsul verməyə başlayır və 3–4-cü ildən ixracata ciddi təsir göstərir.
2020-ci ildə 30 milyon manata yaxın subsidiya ayrıldığı halda, 2022-ci ildə meyvə ixracı əvvəlki illə müqayisədə 38,7 milyon manat artıb. 2021-ci ildə 33,8 milyon manat subsidiya verildiyi halda, 2023-cü ildə ixrac dəyəri 65 milyon manata yaxın artıb.
Son beş ildə intensiv bağlara ayrılan subsidiyaların miqdarı 28%, meyvə ixracı isə 41% yüksəlib.
Tendensiya 2025-ci ildə də davam edib. Bu ilin yanvar–iyul aylarında əvvəlki ilin müvafiq dövrü ilə müqayisədə qoz-fındıq ixracı 33,1%, sitrus meyvələri 54%, alma, armud və heyva 53,6%, ərik, albalı, gilas, şaftalı 33%, nar 37,7%, digər meyvələr isə 76,2% artıb. Həmin dövrdə bağçılığa 43,7 milyon manat subsidiya ayrılıb, ixracın dəyəri isə təxminən 313 milyon dollar təşkil edib.
Nazirliyin məlumatında qeyd olunub ki, Aqrar Subsidiya Şurasının qərarına əsasən, dağlıq və dağətəyi ərazilərdə salınan müxtəlif meyvə bağlarının hər hektarına görə fermerlərə 3 mindən 11,6 min manata qədər birdəfəlik subsidiya verilir. Bundan əlavə, növbəti dörd il ərzində hər hektara görə illik 800 manat əkin subsidiyası nəzərdə tutulub.
