\"Rusiya Türkiyədən asılıdır\"

İqtisadi inkişaf nazirindən maraqlı açıqlama

Ölkə.Az xəbər verir ki, Rusiyanın iqtisadi inkişaf naziri Aleksey Ulükayev "Rossiya 24" telekanalına müsahibəsində rusiya biznesi, xüsusilə turizm sənayesinin Türkiyədən asılı olduğunu etiraf edib.

"Bəli, Rusiya Türkiyədən asılıdır. Elə sahələr var ki, məsələn turizm sənayesi, onlar asılıdır. Məhz bu sahələrdəki məhdudiyyətlər daha çox nəzərə çarpır", - deyə nazir qeyd edib.

Ulükayev həm də türkiyə məhsullarından olan asılılığın da yüksək olduğunu vurğulayıb.

"Türkiyədən pomidor idxalının payı olduqca yüksəkdir", - deyə Ulükayev əlavə edib.

Onun sözlərinə əsasən, yalnız indi Türkiyəyə qarşı tətbiq olunmuş sanksiyaların nəticələri qiymətləndirilməyə başlanıb.

"Lazımi tədbirlər görülməlidir, ancaq hələlik vəziyyət qiymətləndirilmə mərhələsindədir", - deyə nazir bildirib.

Xatırladaq ki, Rusiyaya məxsus qırıcı təyyarə noyabrın 24-ü Türkiyənin Suriya ilə sərhədindəki Hatay vilayətində vurulub. Hərbi təyyarə Türkmən dağı ərazisindəki Qızıldağ istiqamətində yerə düşüb. Pilotlar katapulta etsələr də, onlardan biri ölüb. Digər pilotlar isə xüsusi təyinatlıların keçirdiyi 12 saatlıq əməliyyat nəticəsində xilas edilib. Bundan sonra Rusiya və Türkiyə arasında münasibətlər kəskinləşib.

Bundan sonra Rusiya birtərəfli qaydada Türkiyəyə iqtisadi sanksiyalar tətbiq etməyə başlayıb.

Rusiya prezidenti Vladimir Putin 28 noyabr tarixində Türkiyəyə qarşı xüsusi iqtisadi sanksiyaların tətbiq edilməsi barədə fərman imzalayıb. Sənəddə 2016-cı il yanvarın 1-dən Türkiyəyə qarşı viza rejiminin tətbiq edilməsi də nəzərdə tutulur.

Rəşid Mustafazadə

Ölkə.Az