Qocalmanı ləngitməyin 5 sadə yolu

Britaniyalı mütəxəssislər Henry Cheung və Charlotte Gowers hesab edirlər ki, uzunömürlülüyə aparan yol bahalı əlavələrdən və texnoloji qurğulardan deyil, gündəlik həyat tərzində edilən sadə dəyişikliklərdən keçir. Onların fikrincə, əsas məqsəd xronoloji yaşı azaltmaq deyil, orqanizmin real vəziyyətini əks etdirən bioloji yaşa təsir etməkdir.

1. Davamlı fiziki aktivlik

Mütəmadi idman, xüsusilə həftədə ən azı üç dəfə güc və aerobik məşq, DNT metilasiyasına müsbət təsir göstərərək bədəni təxminən 2 il cavanlaşdıra bilər.

2. Balanslı və təbii qidalanma

Tərəvəz, meyvə, balıq və tam taxıllardan ibarət sağlam pəhriz 6–12 ay ərzində bioloji yaşı orta hesabla 2,4 il azalda bilər.

3. Keyfiyyətli yuxu

Yuxu hüceyrələrin bərpasında və hormon tarazlığında əsas rol oynayır. Gecə cəmi 5 saatdan az yatmaq isə həm xəstəlik riskini artırır, həm də orqanizmin qocalma prosesini sürətləndirir.

4. Zərərli vərdişlərdən uzaq durmaq

Xüsusilə siqaret çəkmək bioloji yaşa 4–5 il əlavə edə bilir və bədənin bütün sistemlərinə mənfi təsir göstərir.

5. Stressin idarə edilməsi

Xroniki stress hüceyrə səviyyəsində qocalmanı sürətləndirir. Həftədə 40 saatdan artıq işləmək bioloji yaşın təxminən 2 il artmasına səbəb ola bilər.

Alimlər vurğulayırlar ki, gündəlik həyata əlavə edilən kiçik, lakin davamlı vərdişlər bioloji yaşa böyük təsir göstərir. Qocalmanın sürətini azaltmaq isə əsasən insanın öz seçimlərindən asılıdır.

Leyla

Ölkə.az