Müəllimlər məktəbdə daha uzun müddət qalsa, təhsili nə gözləyir?

Ölkə.az xəbər verir ki, iqtisadçı Eldəniz Əmirov bu barədə müzakirələrə münasibət bildirib.

Onun sözlərinə görə, belə bir qərarın tətbiqi kişi müəllimləri məktəbdən daha da uzaqlaşdıracaq:

"Bundan əlavə, özəl təhsil müəssisələri artacaq. Tanınmış repetitor məktəbi tərk edəcək və ya evində, ya da fərdi kurslar yaradaraq fəaliyyətini davam etdirəcəklər. DİM imtahanında müəllim ixtisaslarına keçid balları kəskin düşəcək. Müəllimin artmayan reputasiyası daha da geri gedəcək.

Pedoqoji heyət bu qərardan narazı qalacaq, hətta kifayət qədəri bu peşəni seçdiklərinə görə məyusluq hissi yaşayacaqlar. Məktəblərdə müəllim otaqlarında oturmağa belə yer olmayacaq. Basabas avtobus mənzərəsinə oxşayan mənzərəni indidən təsəvvür etmək olur. Şagirdləri onsuzda hədsiz azalan kənd məktəblərində müəllimlərin həyat şəraiti və ev təsərrüfatlarının idarə edilməsi ilə bağlı isə ciddi problemlər yaşanacaq. Təxminən 10-15 il sonra heç bir müəllim işsiz qalmayacaq. Əksinə məktəblər müəllim axtaracaq".

Həmidə ibrahimova