Deputat: Sülhə qarşı çıxanlara seyirçi qalmayacağıq

Ölkə.az xəbər verir ki, bunu deputat Sahib Alıyev parlamentdə çıxışı zamanı deyib.

Deputat bildirib ki, selektivçilik dedikdə Paşinyanın Qərbdə qatıldığı tədbirlərdə bu təşəkkürü nədənsə unutmağa üstünlük verməsini nəzərdə tutur:

“Ziddiyyətlilik isə ondadır ki, Ermənistanın baş naziri bir tərəfdən tamamilə əsassız olaraq Qərbi Azərbaycan İcmasını başında imperiya agentlərinin və terrorçuların dayandığı ‘Krunk’la eyniləşdirir, Qarabağı könüllü tərk edən ermənilərin geri dönüşü ilə Ermənistandan deportasiya olunan azərbaycanlıların məsələsinin ikitərəfli danışıqlarda həllini təklif edir, digər tərəfdən isə Avropa İttifaqı ilə imzalanan sənəddə bunun əksini görürük”.

Sahib Alıyev qeyd edib ki, Ermənistan rəhbərliyi maraqlarına uyğun gələndə məsələni beynəlxalqlaşdırmağa, çoxtərəfli platformalara çıxarmağa çalışır: “Amma unudurlar ki, son 5 ildə bu cür addımlar onlara acı təcrübədən başqa heç nə verməyib”.

Deputat həmçinin Paşinyanın bir tərəfdən erməniləri Rusiyaya xidmət etməkdə suçlandıraraq ruhanilərə qarşı sərt addımlar atmasını, digər tərəfdən isə Moskvanın rəğbətini qazanmaq üçün Rusiyada keçirilən ikinci-üçüncü dərəcəli tədbirlərə böyük həvəslə qatılmasını ziddiyyətli mövqe kimi qiymətləndirib.

Onun sözlərinə görə, Azərbaycan xalqı yaxşı anlayır ki, Ermənistana benzin satılmasına razılıq nə maddi qazanc naminə verilib, nə də qarşı tərəfin təşəkkürünə ehtiyac duyulur:
“Azərbaycan bununla bir daha göstərir ki, istər Brüsseldə olsunlar, istərsə də qulağımızın dibində – hər hansı qüvvə Prezident İlham Əliyevin regiona gətirdiyi sülhə qarşı hərəkət edərsə, biz seyirçi qalmayacaq, lazımi əks tədbirləri görəcəyik və görürük”.

Mürtəza