Paşinyan: Azərbaycan benzini Ermənistanda inhisarçıları çökdürdü 

Ölkə.az xəbər verir ki, bunu Ermənistanın baş naziri Nikol Paşinyan deyib.
Onun sözlərinə görə, Azərbaycandan benzin idxalına başlanıldıqdan sonra Ermənistan vətəndaşlarının cibində on milyardlarla dram qalıb.

“Əlbəttə ki, dəqiq hesablamamışam, qoy oturub saysınlar. Bu, on milyardlarla deyil, 9 milyard 876 milyon dramdır. Amma bu, məsələnin mahiyyətini dəyişmir”, – deyə Paşinyan bildirib.
Baş nazir qeyd edib ki, bu hadisə münasibətilə hamını təbrik etmək olar:
“Dünən eşitdim ki, deyirlər: ‘Yerabluru benzinə görə unutmusunuz, bunu unutmusunuz, onu da unutmusunuz’. Xeyr, bu doğru deyil”, – Paşinyan vurğulayıb.

O, eyni zamanda Azərbaycandan benzin idxalının Ermənistanda inhisarçılığa son qoyduğunu bildirib:

“Gözümüzün qarşısında benzin və dizel yanacağı bazarlarında uzun illər mövcud olmuş inhisarlar kağız evlər kimi çökür. Təbii ki, bu şirkətlər indi son cəhdlərini edirlər, böyük vəsaitlər xərcləyir, ‘vətənpərvərlik’ şüarları altında inhisar mövqelərini qorumaq üçün əks-kampaniyalar aparırlar”.

Paşinyan əlavə edib ki, Ermənistan istehlakçıları onilliklər ərzində bu inhisarlar ucbatından trilyonlarla dram ödəyiblər:

“Bu gün isə heç kim izahat vermək istəmir. Halbuki əminəm ki, Ermənistanda qanunsuz yaradılmış və fəaliyyət göstərən əmlakın müsadirəsi mexanizmləri işləyəcək və bütün bu suallara cavab veriləcək”.

Mürtəza