Azərbaycanlı aktrisanın şəkli “Temu”da: Bizi aldadırlar? - VİDEO

Ölkə.Az xəbər verir ki, məsələ ilə bağlı paylaşımı jurnalist İlhamə Əli öz feysbuk hesabında edib.

Məhsulun effektini göstərmək üçün tonal kremin reklamında azərbaycanlı aktrisanın fotosundan istifadə edilib.

Sözügedən foto isə azərbaycanlı stilist Anar Ağakişiyevin 2018-ci ildə Əməkdar artistlə çəkdiyi dəyişim videosundan götürülüb.

“Şəkil “Temu”da qarşıma çıxdı. Əvvəl bənzətdiyimi düşündüm, amma rəfiqəmə göndərdim o da təsdiqlədi ki, şəkildəki xanım, aktrisa Nahidə Orucovadır. Bu Çinlilər niyə bizim şəkillə bizi aldadır?”, - deyə İ.Əli yazıb.

Sözügedən paylaşıma Xalq artisti Faiq Ağayev N.Orucovanın adını işarələyərək şərh yazıb.
“Xəbərin var, gözəlim?”, - deyə o qeyd edib.

"Temu"dan Ölkə.Az-a bildirilib ki, "Temu" platformasında görüntülərin və ya məzmunun hər hansı icazəsiz və ya qeyri-münasib istifadəsini qadağandır:

"Əqli mülkiyyət hüquqlarını qorumaq və çaşdırıcı məzmunun qarşısını almaq üçün müvafiq siyasətlər və icra prosesləri həyata keçiririk. Bu məsələdən xəbərdar olduqdan sonra, biz dərhal həmin elanı sildik və siyasətimizə uyğun olaraq bu növ halları izləməyə və aradan qaldırmağa davam edəcəyik".

Billurə Yunus